Nga kloi ban ai ki jingmynjur lada ki Aiñ-rew ki ADC ki long kiba shong aiñ, ong u Lat ka jylla

Shillong, K’ Lyngkot 18: Ha ka jingïalang jong ka Dorbar Iktiar Paidbah kaba la pynlong da ka Khasi Hills Autonomous District Council ha ka sngi saitjaiñ la ïakren ha kiba bun ki liang khamtam ha kaba ïadei bad ka jingshim jait na ka kmie ha kaba u Lat ka jylla u long u kongsan ha ka jingïadonlang u Symbud Myntri Rangbah ka jylla u Bah Prestone Tynsong uba khmih ïa ka tnat DCA, u nongïalam ka liang ïatei ha KHADC u Bah T W Chyne nalor ki EM bad kiwei kiwei.
Ha kane ka jingïalang ba la donlang u Lat ka jylla u C H Vijayashankar ha kaba ki la don bun kiba la shim bynta khamtam na ka liang ki nongïalam jong ki synjuk ki nongïalam shnong, ki synjuk jong ki kur bad kumjuh ruh na kiwei kiwei, ba kynthup ïa ki MDC kiba don ha ka liang ïatei nalor kiwei pat.
Ha kane sngi na ka liang jong u Lat ka jylla u la ong ba u sngewburom shisha ban ïohsngew ïa ka jingdon jong ki jait bad ki riti dustur ha kane ka jylla. “Nga sngew ba ka long ka burom ban ithuh bad pynkupbor ïa ki seng bapher bapher kiba la shim khia ha kaba ïadei bad ka jingdonkam ban ithuh ïa ki seng kur bad kiwei kiwei. Nga ai burom ïa ki longkmie bad ka jingai jait kmie kaba long kaba kyrpang bha ha kane ka jylla,” ong u Lat ka jylla.
Ha kane ka jingïalang u Lat da ka jingkmen u la pynpaw ba dei halor kane ka jingïohi jong u halor ka riti dustur jong kane ka jylla kaba la pynlong ïa u ban mynjur ïa kiba bun ki Bill ba la mynjur da ka KHADC.
“Na kata ka daw nga la mynjur ïa ki aiñ ka KHADC ban ai bor bad pynkupbor ïa ki seng bapher bapher bad nga ai mynsiem ïa baroh ba kin pynneh ïa ki rukom treikam ki seng bad ki dorbar shnong kiba ïaid ruh lang bad ki riti dustur jong kane ka jylla,” ong u Lat.
“Nga kyntu ïa ki district council ba kin treilang bad ka sorkar khamtam ha kaba ïadei bad ka pule puthi kaba long kaba kongsan bha ha kane ka por kaba mynta, ngi donkam ban pynurlong ïa ki jingphoh sniew ha ka ban kyntiew ïa ka jylla baroh kawei da kaba ïatreilang,” ong u Lat ka jylla.
Ha kane ka sngi ka la don ruh ka jingbam smai na ka bynta ban pynneh ïa ki riti dustur kaba kynthup ruh ïa ka jingpynduh jait ïa u drok na kane ka jylla.
Ha kane ka jingpyntian smai la ong ruh ba da ka jingïatreilang yn lah ban pynlong ïa ka Meghalaya kaba lah ban ïeng ha la ki jong ki kjat.
Na ka liang jong u Lat u la ong ba kum u khlieh ka jylla u kwah ban wanrah ïa ka roi ka san bad ka bha ka miat jong ki nongshong shnong. “Kino kino ki bym tip ïa ka khana pateng kin ym lah ban shna ïa ka khana pateng.
Kadei ka kamram jong nga ban ïatreilang halor ki kam pynroi ba la shim da ka sorkar jylla bad lada nga lap ba kidei kiba shong aiñ nga kloi ban mynjur ïa ki aiñ ki ADC lyngba ka jingai jingmut jong ka sorkar jylla.