U Lat ka jylla u long kum u kñi naba u la mynjur ïa kiba bun ki Bill ka KHADC: Bah Prestone

By Mawphor Editor On Jan 19, 2025

Shillong, K’ Lyngkot 18: U Symbud Myntri Rangbah ka jylla bad u Myntri uba khmih ïa ka tnat District Council Affairs u Bah Prestone Tynsong u la ong ba u Lat ka jylla u la long kum u kñi jong ka jaitbynriew Khasi naba u la sngewthuh ïa ki rukom bat khyndew, ki riti dustur bad ki aiñ kiba kyrpang bad dei halor kane ba u la pynkloi ruh ban ai ki jingmynjur ïa kiba bun ki Bill ka KHADC kiba la phah da ka tnat DCA.
Ha ka jingïalang ka Dorbar Iktiar Paidbah ba la pynlong da ka KHADC ha Polo u Bah Tynsong u la ong, “Nga kmen ban don ha kane ka prokram, ha ka kam long nongmihkhmat kan dei ka sien kaba nyngkong ban sakhi ïa ka prokram. Nga kmen ban ïohi ïa u Lat ba ka jingdon jong u tang kyndiat bnai hynrei u la long kum u kñi jong ka jaitbynriew naba u la pyrshang ban sngewthuh ïa ki riti dustur jong ka jaitbynriew Khasi bad dei halor kane ba u la mynjur ïa kiba bun ki Bill jong ka KHADC, nga ngeit skhem ba ka jingdon une u Rangbah kan long ka jingkyrkhu ha kane ka jingïalang. Nga la ïohi ïa ki jingkylla ha ki 3 tylli ki ADC hadien ka 2018, bad hapoh kane ka snem ki don bun ki bill kiba la jah noh bad klet wat ïa ki tarik jong kine ki bill hynrei ha kane ka sorkar kaba mynta la lah ban ai ki jingmynjur bad hadien u snem 2018 ngi la lah ban ai jingmynjur ïa ki bill hadien ba la pynlong ïa ki jingïasyllok bad ki la don bun ki bill ba la mynjur,” ong u Bah Tynsong.
U la ong ruh ba hadien ba la pynmih ïa ka hukum jong ka High court ha u snem 2014 la pynlong ïa ka sorkar jylla ban shna ïa ki aiñ ban ïada ïa ka ri bad ka jaitbynriew, ïa ka district council bad kymjuh ruh ïa kiwei.
“Nga ïohi ba ka Land Bill ka la pynskhem ïa ka riti dustur bat khyndew da ki Kur, ki Hima, ka Raid ne nongkynti. Ka MMDR Act kam lah ban treikam ha kane ka jylla Meghalaya bad dei ha u snem 2019 ka Supreme Court ka la pynskhem ba ym tang ha sla khyndew hynrei shaduh sha ramew la long trai da ki trai khyndew,” u la ong.
Ha kawei pat ka liang u CEM ka KHADC u Bah Pynïaid Sing Syiem u la ong ba ka jingai ka jingmynjur jong u Lat ïa ka Administration of Elaka Act 2023 ka la long kaba kongsan bha.
“Kane kadei ka sien ba nyngkong ban ïohi ïa u Lat uba sngewrit bad kane la sakhi lyngba ka jingwan ïashimbynta ha kane ka sngi. Ngi la don kumba 54 tylli ki Elaka, 5 hajar ki shnong ba kynthup ïa ki seng Kynthei, ki seng samla, ki dorbar shnong bad la don haduh 5 hajar tylli ki kur ha kane ka jylla. Kane kan long ka sngi sah kynmaw ban ithuh lyngba ka aiñ ïa kine ki seng baroh,” ong u CEM.
Haba pynpaw ïa ka jingsngew nguh ïa ki Syiem, ki Lyngdoh, ki Wahadadar, ki seng bapher bapher, u CEM u la ong, “Nga ai khublei ïa baroh ki 30 ngut ki MDC ha kane ka term kaba mynta ba lyngba ka 6th Scheduled la ai bor ïa ngi ban thaw aiñ. Kaba sngew tynnad ka long ba ïa ki aiñ ba la dep ban mynjur la lah ban pynkylla sha ka ktien Khasi. Naduh mynta ka sngi la ithuh ïa baroh ki seng, ki dorbar shnong, ki sengkur, ki Rangbah kur, bad la bthah ïa baroh ba kin pynrung kyrteng ïalade hapoh ka KHADC lyngba u Registrar.”
Ha kane ka sngi la sam ruh ïa ki syrnot jingithuh sha ki seng bapher bapher kiba la shah khot sngewbha ha kane ka sngi, la ïoh ki jingkren na kiba bun ki rangbah bad kumjuh ruh na ki nongïalam Hima bad la ïoh ka jingai khublei na ka EM ka KHADC kaba khmih ïa ka tnat Ïew ka kong Grace Mary Kharpuri bad ki jingpynbyrnia na ka kynhun shad jong I kong Sylbi Passah bad kiwei kiwei.