Nga khlem pep khnang hynrei dei ba khlem ai jingtip kaba thikna ban tip ki paidbah: Dr Kharlukhi

Shillong, Jymmang 30 : U President ka National Peoples Party (NPP) ha kane ka jylla u Dr W.R Kharlukhi u la pynshai ba ym dei satia ba u pep khnang sha ka jingïatyrko nia hynrei ka dei tang namar ba khlem ai jingtip kaba thikna lyngba ki lad pathai khubor khamtam eh na u Mawphor.
Balei u ong ïa kane namar ha ka por ba ka VPP ka kob tyrko nia ka la mih ha ka kot khubor Mawphor ha ka 22 tarik Jymmang 2023 bad hadien katei ha ka 23 tarik la mih ka jubab na u halor kane da kaba u la ai jingmut ban pynïaid ïa ka jingïatyrko nia da ka National Law University namar ba kane ka la kthah ïa ki katto katne ki kyndon ka Riti Synshar ka Ri.
“Kumta namar kine ki ar sien mih ki la mih ha u Mawphor nga dang kyrmen ba kan sa mih biang hi ha u Mawphor hynrei la ap shi taiew ruh ym shym la mih ei ei ruh hynrei kyndit kyndit mynta ka sngi lamih ka khubor ha ka Shillong Times ba la kren da u Dr Ricky Synkon kaba la ong ba nga pep sha ka jingïatyrko nia. Hooid nga la ïoh pdiang ïa ka phone call na uwei u Dr Marbaniang na St Anthonys’ College kata ha ka 19 tarik Jymmang 2023 uba pyntip ba ka VPP ka kwah ban ïa tyrko nia bad nga ha St Anthony’s College ha ka 20 tarik Jymmang 2023. Nga la jubab ïa u da kaba ong sngewbha ong ïa ki ba kumba ka la mih ha u Mawphor kumta ki dei ban pynmih ïa kane ka jingïakob tyrko nia ruh lyngba u Mawphor khnang ba ki paidbah ruh kin ïa tip lang bad ïoh ban wan sngap hynrei ym shym la leh kumta” ong u Dr Kharlukhi.
“Kane ka jingïatyrko nia halor kane ka mat kam dei ka ban shu ïatai, ïa pyniap nia ne pynshongnia hangno hangno lada ka long kumta ban don tang da ka Panel Discussion ruh la biang. Hynrei kane ka jingïatyrko nia ka dei halor ka Resolution kat kum ka 12 tarik Kyllalyngkot 1972 kaba la ktah ruh ïa ka Clause ba 4 jongka Article 16 jong ka Riti Synshar ka ri bad kumjuh ruh kat kum ka Rai ne Ruling jongka ïing bishar Supreme Court 1992 ba ym lah ban buh bhah kyrpang palat ïa ka 50%. Kumta kane ka jingïatyrko nia ka la long kaba la hap ban ïaktait ruh ïa ka Riti Synshar ka ri kumta kumba phi la kob nga don ka hok ban buh ïaki kyndon bad kumba phi la kob nga kyrmen ba phin pdiang ruh ïa kane. U Dr Myrboh u dei u samla pule ha ka Political Science bad Ph.d ha ka Political Science. Nga ruh nga dei u samla pule ha ka History bad Ph.d ha ka Political Science kumta baroh arngut ngim dei ki stad aiñ ne riewshemphang ïa ka ain.Nga ai jingmut ba u Nongbishar ba la shongthait na kane ka thaiñ ban long kum u nongbishar ïa kane ka jingïakob tyrko nia. Lada long lei lei da u Chief Justice ba la shongthait ka India uba long ruh mynta u MP lane da kino kino ki Nongbishar ba la shongthait jong ki ïing bishar Hihg Court. U Moderator pat un kham biang lada khot ïa u Vice Chancellor jongka National Law University hynrei lada ym dei da uta ruh lah ban khot da kino kino ki Riew Said Aiñ ba tbit ba la rim. Ka jaka ba nga tyrwa ban ïa tyrko nia kan long ha Conference Room Secretariat kaba ngi la pynlong ïa ka All Party Meeting namar kane ka jingïatyrko nia ka dei na ka bynta ka bha ka miat jongka jylla. U Dr Myrboh u dei u paralok jongnga ha Synod College. Kumta ngi baroh arngut ngi lah ban ïa pynbeit lang ïa ki jingdonkam namar nga ngeit skhem ba ka por ka la dei eh ba ki paidbah kin shai sani bha ïa kiei kiei kiba jia sawdong jong ngi bad kiei kiba lah ban ktah na ka liang jongka Aiñ. Kiban ïadon lang ki dei ban long ki riewstad aiñ, ki riew pawkhmat bad ki lad pathai khubor.Lada ngi lah ban pynlong ïa kane kaba jop ngan jin da la kmen eh ba kan don kum kane ka jingïatyrko nia hashwa kano kano ka election ruh” pynkut u Dr Kharlukhi.