Nga dang khlaiñ, ong u Secretary ka GTF hadien arsngi ba shah thngan ha madan Malki

Shillong, Ïaiong 19 : U General Secretary jong ka Green Tech Foundation, u Ritre Sungoh ha ka sngi U Blei u la pynpaw ba haduh mynta u dang sngew shait sngewkhlain wat hadien ba ka jingshah thngan jong u ka la ïaid palat 48 kynta.
U Ritre u la bteng ïa ka jingshah thngan hadien ba ïa u President ka kynhun la ïalam noh sha jaka sumar na ka daw ka jing ktah ha ka koit ka khiah namar ka jingshah thngan kaba la ïaid sha ka sngi kaba 9.
Ha ka jingïakren bad ki lad pathai khubor, u Ritre u la ïathuh ba ki doktor naduh mynstep haduh janmiet ki wan ban peit bniah ïa ka koit ka khiah jong u. “Ka jingkoit jingkhiah jongnga ka biang watla ka don khyndiat ka jingtyrkhong ha ka met,” u la ong.
Nangta u ong ruh ba ka jinglah jong u ban bteng kadei na ka jingkyrshan jong ki paidbah kaba pynlah ba un bteng khlem sangeh ha kine ki 48 kynta. “Kane ka dei namar ka jingkyrshan bad ka jingduwai lang jong ki ïangi baroh,” u la ong.
Kumban shu kdew hangne, ka Green Tech Foundation ka la mih ban pynlong da ka jingshah thngan ban pynbor ïa ka sorkar ba ka dei ban pyndam noh ïa ka projek kam jngohkai pyrthei bad kumjuh ïa ka soskular aiwai ïa ka dewlynnong Lumpongdeng.
U General Secretary u la iathuh ruh ba na u President wat hadien ba la ialam noh ia u sha jaka ai jingsumar hynrei haduh mynta u dang bteng beit ia ka jingshah thngan.
Lah ban kdew hangne ba ïa u Chairman ka Foundation la ïalam noh sha jaka sumar ha ka janmiet sngi Thohdieng ban ïoh ïa ka jingsumar kaba paka.