Ka sorkar MDA ka pynthikna ba ka roi ka par ka dei ban long ha baroh 60 tylli ki Constituency

Shillong, Iaiong 19: U Symbud Myntri Rangbah ka Jylla bad MLA ka Nartiang u Bah Sniawbhalang Dhar ha ka sngi Saitjain, ula ong ba ka sorkar MDA hapoh ka jingïalam u Myntri Rangbah u Conrad K Sangma ka pynthikna ba ka roi ka par kan long ha baroh ki 60 tylli ki Constituency kynthup ia kito kiba la mihkhmat da ki MLA na ka Liang Pyrshah.
“Hapoh ka jingïalam u Myntri Rangbah, ka sorkar MDA kala pynïar ïa ka roi ka par ha baroh 60 tylli ki constituency. Ka dei tang kane ka sorkar kaba ïalam da ka NPP, kaba la pynïar ïa ki kam pynroi wat ha ki constituency kiba la mihkhmat da ki MLA na ka Liang Pyrshah” ong u Bah Dhar ha ka jingplie ïa ka projek kaba 100 Klur tyngka ha ka shnong Wahiajer, West Jaintia Hills District.
“Kam don wat tang kawei ka constituency kaba la shah ieh shadien. Ka sorkar kala wanrah bun bha ki kam pynroi ha ka New Shillong bad ha ki constituency bapher bapher. Kata ka dei ka sorkar MDA kaba la ïalam da ka NPP” ula bynrap.U Bah Dhar ula ïaroh ïa u Symbud Myntri Rangbah u Bah Prestone Tynsong halor ka jingpynïaid shakhmat ïa ki jingtei ki bapher.
“Ngi dap da ka jingsngewsarong ban don ïa u Symbud Myntri Rangbah u Bah Prestone Tynsong uba khmih ïa ka PWD ha kine ki 8 snem kiba la dep. Nga sngewsarong ïa kata, ha kaba ïadei bad ki kam pynroi ïa ki jingtei, ka Meghalaya ka la jam shakhmat bha”.
Ula pynpaw ba jingthmu ban pynheh ïa ka surok na Lad Umroi-Silchar ka dei kawei na ki projek kaba kongsan bha.
“Kawei na ki projek kaba heh ha ka ri kaba palat ïa ka.21,800 Klur tyngka ka jingshna ïa ka surok na Lad Umroi shaduh Silchar, shen kan sa don noh ka jingbuh ïa u mawnongrim da u Myntri Rangbahduh ka ri. Kane kan dei ka surok Four Lane Greenfield Project ka ban ïaid lyngba katei ka jaka”.
Ha kaba ïadei bad ka jingbhah kaba ïa ryngkat, ula ong, “Nga kwah ban pynpaw ïa ka jingkmen halor ki kam pynroi ha ka constituency ka jong nga. Ngi don ïa u Symbud Myntri Rangbah uba khmih ïa ka PWD u bym shah liang bad peit ïa baroh 60 tylli ki constituency. Ha West Khasi Hills, ki la mih ki surok kiba thymmai. La jan man la ki tnad sorkar la ka dei ka koit ka khiah, kam jngohkai ne ka umbam umdih, ki kam pynroi ki dei kiba la pynïar sha baroh ki constituency. Ngi lah sam ïa bhah tyngka ha kata ka rukom ba kan ym don kano kano ka tnad ka ban shah ñiew beiñ”.
U Bah Dhar ula pynshai halor ka jingkyntiew ïa ka bhah tyngka ha ka kam jngohkai. “Mynshwa, ka tnad jngohkai ka ju ïoh ïa ka mang tyngka kaba 20 Klur tyngka hynrei naduh ba ka sorkar MDA ka la wan ha ka bor, kaba duna eh ka dei da ki hajar klur kiba la bhah na ka bynta kane ka tnad man la ka snem”.
Ula kdew ruh halor ka jingkiew ka jylla ha ka jingpynlut. “U Myntri Rangbah ula pynpaw ha man la ka jingai jingkren ha kaba ïadei bad ka Mang Tyngka ba ha u snem 2018, ka Mang Tyngka jong ka jylla ka long tang 9,000 Klur tyngka bad hapoh jong ka 8 snem ka la kiew sha ka 32,000 Klur tyngka. Balei? Namar ba kane ka sorkar ka treikam. Ngi ngim don ïa ka por ban pynleit jingmut ïa kito kiba kynthoh ïa ka sorkar, namar ngi bunkam ban shakri ïa ki paidbah bad ia ka jylla”.
“Lada ka sorkar kam trei ïa ka kam, ki paidbah kin ym ïoh lad ban kynthoh eiei ïa ngi. Ki briew ki kawang maw tang ïa u dieng uba seisoh bha” ula ong.
Ha kaba ïadei bad ki projek ki ban dang wan, u Bah Dhar ula ong, “Ngi ngin wanrah ïa ki projek kam pynroi ki ban kot da ki klur tyngka ha ka jylla baroh kawei. Ka jylla kan pynlong ïa ka National Games. Napdeng ki 27–28 tylli ki jylla ha ri India, ka Meghalaya hapoh ka jingïalam u Myntri Rangbah, ka la lah ban ïoh ïa ka kyrdan ban pynlong watla ka la don ka jingïakhun na ki jylla kiba heh”.
Ha kaba ïadei bad ki jingkynthoh halor ki Concert ne ki tamasa ka tem ka put kaba wan ban tem da ki kynhun nabar ri, ula ong, “Namar kine ki nongtem, ïa ka Meghalaya la tip lut da ka pyrthei baroh kawei. Ki briew ki la kylli “Shaei ka don ka Shillong kaba kine ki nongtem ki leit ban tem?’ Ka don ka por ïa kiei kiei baroh ha ka jingim”.
“Ki don ki riewsaiñ pyrthei kiba don ïa ka por ban pynlut bad ki paidbah ha ki shnong bapher bapher hynrei kim ai pat ïa kino kino ki kam pynroi. Mynta kito kiba trei malu mala ki don ïa ka por ban shong. Kum ki riewsaiñ pyrthei, bun ka por kaba ngim ju ïoh ban leit jngoh ïa la ka constituency namar ba ngi bunkam hapoh Secretariat, ban wanrah ïa ki kam pynroi ïa ka jylla. Kumta ka long kaba bha ban ïaroh ïa ka sorkar bad ïa ki kam kiba bha ki jongka. Lada phi ïaroh, ngi kum ki Nongmihkhmat ngi ïoh mynsiem ban trei shitom shuh shuh” la bynrap u Bah Dhar.