Shillong, Naiwieng 13 : Ka Meghalaya ka la rung sha ka phainal jong ka lympung ïalehkai 2nd North East Olympic Games 2022 ha ka kyrdan U-21 ki shynrang hadien ba ka la pynliem da 3-0 kol ïa ka Manipur ha ka jingïalehkai hynne ka janmiet sngi U Blei ha madan MFA Third Ground, Polo, Shillong.
Ka Meghalaya kan aireng pat pyrshah ïa ka Mizoram ha ka phainal kaba la ïoh rung da kaba pynliem da 3-1 pyrshah ïa ka Nagaland. Lyngba katei ka jingïoh rung sha ka phainal ka Meghalaya ka la thikna lypa ban khur takma la ka long ka takma Ksiar lane ka takma Rupa.
Ha ka jingïalehkai semifinal hapdeng ki spah ngut ki paidbah kiba la wan ban sakhi ïa ka jingïalehkai, ki rangïalehkai ka Meghalaya ki la ïoh ban pynshat bol ha ka rukom kaba itynnad bha. Ka Meghalaya ka la ïoh ban pynkhih jar ha ka minit ïalehkai ba 11 lyngba u Figo Syndai shwa ba u Nelson Rymbai u thep ïa ka kol kaba ar ha ka minit ïalehkai ba 20 bad lamkhmat da 2-0 kol ha kaba kut jong ka kylla step.
Ka Manipur ruh khlem da kynran dien ka la pynkhlaiñ ïa ka jingïalehkai ha ryngkat ka jingai mynsiem ki paid nongkyrshan hynrei ka khlem lah pat ban ksam lyngba sha ka kut na ka jingskhem ki rangap dien ka Meghalaya. Hapdeng ka jingïalehkai kaba itynnad bad shondhit bha, u Everbrightson Mylliempdah u la thep ïa ka kol kaba lai na bynta ka Meghalaya ha ka minit ïalehkai ba 88 ha kaba ka kynhun ka la khur suk ïa ka nam jop.
Shwa kane, ka la don ka jingïalehkai semifinal hapdeng ka Mizoram pyrshah ïa ka Nagaland, ha kaba ka Mizoram ka la jop da 3-1 kol. Ha katei ka jingïalehkai ka Nagaland ka la lamkhmat nyngkong da kaba thep shi kol ha ka minit ba 11 hynrei ka Mizoram ka la lah ban pynphai ïa kitei ki kol lyngba u Joseph Lalvenhima, nangta u Aron Vanlalrinchhana (39 min) bad Rohlupuia (51 min) ki la thep mar shi kol.
Ka Manipur bad ka Nagaland kin hap ban ïakhun pat ban ïaknieh kyrdan ba lai bad takma Rnong ha ka sngi ba ar ka por 4:30 baje janmiet. Ka jingïakhun semifinal jong ki kynthei kan long lashai ka sngi Nyngkong, ka Manipur pyrshah ïa ka Mizoram ha ka por 11 baje mynstep bad ka Arunachal Pradesh pyrshah ïa ka Sikkim ha ka por 4:30 baje janmiet.
