Ki paidbah ki wanrah jingeh hi dalade ïalade

0

Ym lah ban beiñ tang ïa ka Sorkar da kaba kynnoh ba kadei maka kaba wanrah ïa ki jingeh baroh bad kaba kam sym la lah ban pynduh ïa ki hynrei la shem ba ki paidbah ruh ki long kiwei kiba wanrah ïa ki jingeh kiba la long ki mawjynthud bad pynkharoi shuh. Ka Jylla jong ngi kumba baroh ki ju ong ba ka long kawei na ki Jylla ba shongsuk shongsaiñ hapoh ka ri. Pynban mynta ka la kylla long kawei na ki ktem kam sniew ba har rukom. Ka jingeh ki mynder poi ei kiba la sdang ban pynkhihwin ïa ka shnong ka thaw, ka jingbym lah ban khang ïa ka jingwan ki mynder ka long kawei na ki jingeh kaba ktah ym tang shimet hynrei ïa baroh khamtam lem ïa ka lawei pateng kiba dang wan.
Kumba baroh ki ju ong ba kane ka ri ka long kaba tip briew tip Blei bad ki paidbah jong ka ki long kiba don ka mynsiem tiplem para briew, kumta da ka jingjynsur mynsiem bad tiplem para briew mynta ka kynti ka la wanrah shibun k jingeh ba har rukom khlem pyrkhat aiu kan jied ïa ka lawei bad ki pateng kiba dang wan. Ka jingkharoi jong ki mynder hangne hapoh ka jylla kaba la tei ne sei ïa ki jingeh baroh ïa kane ka jingbakla jong baroh kiba la ai jaka sngewlem ïa ki mynder ban shong ban sah hangne. Ym tang katta ngi lah ruh ban kynnoh ïa u paidbah namar haduh mynta kato ka jingsngewlem bad jingjynsur mynsiem jong ki kam pat duh satia watla ki la ïohi ïa ki jingeh kiba wanlam lyngba kane.
Ka jingwan kyrthep jong ki mynder mynta ka juk ka la wanrah shibun ki jingsniew kiba pynthohbria ïa ka jinglong sngur bad lui lui jong ki briew ka jylla khamtam ki samla. Ka jingkyllei ki kam sniew bad ki jingdih pynbuaid ba har rukom kaba ki samla kane ka juk mynta ki la ngop ka long baroh na ka jingwanrah nuksa ki mynder. Hato ïa kane ngin beiñ ïano? Ym dei ba ailad ki paidbah ka jaitbynriew ïa ki mynder nyngkong eh. Mynta ka jaidbynriew Hynñiewtrep Hynñiewskum ka don hapdeng ka jingma kaba ap sha lyndet ka jingkhang khlem da pyrkhat arsien khlem pep kan jia ba ka bri u Hynñiewtrep kan shah klun tylli na u mynder shi sngi.
Haba ïaphai ha baroh ki liang ha kaba ïadei bad ka imlang ka sahlang ka Jaidynriew jong ngi ka la shah iuhroit ha kiba bun ki liang ha ki mynder la kadei ha ka khaïi ka pateng, ka ïew ka hat ne ka longïing longsem. Ha kaba ïadei bad ka khaïi ka pateng la kadei ha sor ha ki thaiñ nongkyndon ne khappud jong ka jylla ki mynder ki la iuhroit lut ïa baroh ka jingdon jingem jong ki trai muluk trai khyndew bad pynpulom ruh ïa ka ïew ka hat kumjuh ïa ka ïoh ka kot jong ki briew ka jylla. Bunsien haba ïanujor ïa ka die ka thied na ka khaïi ka pateng, ka jingdie ïa ki mar jong ki mynder hangne ha ngi ka long kaba ïaid ïew bha ban ïa ki mar jong ki trai muluk kaba ktah ruh shibun ïa ka jingïoh nong jong ki. Kumta ngi dei ban husiar badban ym ailad ïa ki mynder ban sdang ïa ka khaïi ka pateng jong ki khnang ba kan kyntiew ïa ka ïoh ka kot jong ki briew ka jylla hi baroh kawei. Kum ban shu ong noh bun na ki dukan ruh la shong lut da ki myndeer kiba la pynïar ïa ka khaïi ka pateng jong ki hynrei jong ngi ki la shu long mynder ha la ka jong ka ri, bad dei hangne ba ngi ïohi ba ïano ngin kynnoh hto kam dei ka jingjynsur mynsiem palat jong ngi ha ki por katba ki dang rit paid.
Don napdeng ki paidbah, katba ki seng bhalang hangne ki ïakhih ban kyndang ïa ki mynder kiba khaïi be aiñ khlem ka trading license ïa ki mar ki mata hapoh ïew poh hat ki paidbah ki beiñ bad pynrem ïa ka jingleh jong ki, tang namar ba ki ïoh pisa ki kam kynti ïa ki dukan kiba dei jong ki mynder ban lait na ka jingshah pakhang dei jingdie ki mynder. Dei kane kaba la wanrah bad tei shuh shuh ïa ka jingeh kiba long ki maw jynthut ïa ki seng bhalang ban trei ïa ka kam kaba wanrah ïa ka jingmyntoi bad ka bha ka miat jong ka Jaidbynriew.

Leave A Reply

Your email address will not be published.