Shillong, Lber, 10: Naduh u Rikman G. Momin u la shimti kum u President jong ka Bharatiya Janata Party (BJP) Meghalaya State Unit, u la long barabor uba kloi ban pdiang ïa baroh ki dkhot ka seng bad kane ka la urlong shuh shuh hadien ka jingsakhi ïa ka jingrung jong kumba 90 ngut ki dkhot ka Congress ha Khliehriat ha ka sngi Thohdieng ha ryngkat ka jingplie ïa ka ophis treikam jong ka party ha East Jaiñtia Hills District.
Hadien ka jingwan pynïasnoh jong u MLA barim ka Trinamool Congress na Salmanpara Constituency u Winnerson D. Sangma dang ha kine ki khyndiat sngi bad ka jingpynïasoh jong ki dkhot thymmai na East Jaiñtia ka la nang pynkhaiñ shuh shuh ïa ka Party bad ha kine ki sngi ban sa wan yn sa nang sakhi shuh shuh ïa ka jingrung kiwei kiba la kham paw ha ka saiñpyrthei.
Ka don ka jingkhih napoh napoh kaba la nang pynksan ïa ki rukom trei jong ka party hadien ba u Rikman G Momin ula jied ïa ki nongkitkam kiba treishitom ban pynkiew ïa ka seng. Ym lah ban nujor ba ka seng BJP ka dei ka seng saiñ hima kaba heh duh ha pyrthei. Ka jingtrei shitrhem jong ka kynhun jong u Rikman ka paw lyngba ka jinglah jongki ban pynïar ïa ki shnat treikam jong ka seng ha man la ki konstituensy, la ong ka Seng.
Haba kylli na ki nongrung dkhot thymmai kaei kaba pynlong ïa ki ban iehnoh ïa ka Congress uwei na ki ula ong, “nga rung sha ka BJP hadien ba nga ïohi ïa ka jinglah jong ki nongkitkam ka party ban pynsngewthuh sha ki paidbah ïa ki skhim bapher bapher jong ka Sorkar BJP bad kane ka la pynktik ïa ka mynsiem jong nga’.
Sa iwei na ki nongrung dkhot ila bynrap da kaba ong, “ha ki jylla ba synshar ka BJP ka roi ka par ka la nang kiew ynda ïa nujor bad ka jylla jong ngi bad ka la wan ka por ba ki paidbah ka jylla ki dei ban pdiang ïa ka BJP kumba pdiang ïa kiwei ki National Party namar ka BJP kan sa nang ïai synshar ha Delhi hapoh ka jingïalam u Narendra Modi kum u Myntri Rangbah bad kan ym myntoi lada ka jylla jong ngi kam ïasnoh kti lang bad ka party.”
Haba ïakren bad u President u Rikman Momin ula ong, ‘ki paidbah hi ki dei ki nongrah khubor ïa ki kambah ba ka BJP ka leh hapoh ka jingïalam u Myntri rangbahduh ka ri u Narendra Modi ban kyntiew ïa ka ri bad ban kham sngewthuh shai ïa kiei kiei baroh ïakren bad kito kiba la ïoh kheit ïa u soh lyngba ki jingïarap babun ba la wan na ki skhim kiba u Modi u la pynbna bad shim ruh ïa ki jingsngew jong kito kiba la ïakynduh bad ki nongkitkam ka party kiei ki jingpynshai ba ki ïoh kaba lah ban wanrah jingkylla ha ka jingim jong ki.
