Nongpoh, Lber 10: Ki runar kiba ym lah ban ithuh durkhmat ha ka miet jong ka 8 tarik u Lber 2024 ki la leit ban rong tuh ïa kawei ka Auto Rickshaw na ka sem ba la set ïa katei ka Auto Rickshaw bad tang hadien 4 kynta u trai katei ka Auto Rickshaw ula lap pat ïa katei ka Auto Rickshaw na ka surokbah Mawhati ba la iehnoh jyndat da kitei ki runar hadien ba la don ka jingthud ki kor ki bor katei ka Auto Rickshaw.
Kane ka Auto Rickshaw kaba la shah tuh ka dei jong u Bah Francis Khymdeit na ka Shnong Sohnidan ha Ri Bhoi District bad katei ka Auto Rickshaw ba la shah tuh ka don ïa u number ML 10 A-1912.
Kumba la ïathuh da u Bah Francis Khymdeit, la ong ba kane ka jingshah rong tuh katei ka Auto Rickshaw la tip hadien ba ki la leit peit ha katei ka sem ba ka Auto Rickshaw kam don shuh ha katei ka sem kaba ki la set bad mar kumta hi ki la pynlong ïa ka jingïawad ïa katei ka Auto Rikshaw bad dei hadein kumba saw kynta ei ei ba ki la ïa wad ki la lap noh na ka suork Mawhati ba la jngai kumba 2 km ei ei na ka ïing sah jong ki.
U la ong ruh ka daw kaba la pynlong ïa katei ki runar ban iehnoh noh ïa katei ka Auto Rickshaw ha surok, ka dei namar ba katei ka Auto Rickshaw ka la sniew noh bad namar ba kim lah shuh ba leh ei ei ki la shu iehnoh jyndat noh bad phet noh ïa lade ban lait na ka jingshah kem ne wad ha katei ka jingtuh jongki ïa ka Auto Rickshaw.
Shuh shuh, u la ïathuh ruh kumba la ioh sngew da ki param manjan la ong ba kitei ki runar ki la wan da ka Scooty ban tuh ïa katei ka Auto Rickshaw bad donbok noh ba la don ka jingthud ha katei ka Auto Rickshaw ba ki runar ki la shu iehnoh noh ha ka surok khlem da ioh pat ban rong tuh syndon ïa katei ka Auto Rickshaw.
