Ka kynthei dei ka dohnud jong ka ïing ka sem bad nyngkong ban mane ïa u Blei: Archbishop Victor

Shillong, Lber, 10: Ka Synjuk Ki Seng Longkmie Katholik (SKSLK) Archdiocese Shillong, Zone-II ryngkat ka pyrthei baroh kawei ka la rakhe kyrpang ïa ka sngi bakyrpang jong ki kynthei ne ka “International Women Day’s” ha ka sngi u Blei ha Divine Saviour’s Church, Nongthymmai Parish.
La sdang ïa kane ka jingrakhe da ka Mass Bakhuid ba la pynmynta da u Lyngdoh Sad ka Jyllaniambah Shillng u Most. Rev. Victor Lyngdoh ryngkat ka jingsynran lang jong u Parish Priest ka Nongthymmai Parish u Sohblei Augustine Kuttala uba dei u Spiritual Director jong ka Synjuk ki Seng Longkmie Katholik , Zone II.
U Archbishop Victor Lyngdoh haba ai ïa ka sneng ka kraw sha ki Longkmie kiba la ïashim bynta ha kane ka lympung ba phra ba la buh ruh ïa ka mat puson kaba ong, “U Kpa jong ki u la ai bynta ïa ki khun kynthei bad ki hynmen shynrang,” ïa kaba la sot na ka kitab u Job 42:15, u la pynpaw ba kane ka dei ka kam phylla jong U Blei ban pynkhraw ka long ba ki kynthei ki don ka bynta kaba khia tam ban ïa tynrong ïa ka kam ka khia ka shon jong ka ïing ka sem bad ka imlang ka sahlang.
“Ka kynthei ka dei ka dohnud jong ka ïing ka sem bad u kpa u dei Khlieh ka ïing, sngewkmen pat ki kynthei ne ki longkmie ki ïalong ryngkat lang ym don bakhraw ne barit,” ong u Lyngdoh Sad.
Ha kane ka sngi u Lyngdoh Sad u ong ruh ba ki longkmie ba mynta ki la paw bad kiew shaphrang wat ha ka imlang ka sahlang haba ïanujor bad ki shynrang la ha ka kam ka jam ki la kham tbit ki kynthei.
“Ki longkmie ne ki kynthei ki dei ka jingaiei jong U Blei bad ki dei ban long borabor kiba nyngkong ban ïaroh ïa u Blei,” u la ong.
Hadien ka nguh ka dem Blei ka la don ka jingïalang kaba lyngkot ba la pynïaid da ka Synjuk ba la lamkhmat da ka President jong ka Synjuk ka Kong Cathleen Pyngrope bad kumjuh ka jingïakob rwai da ka ktien U Blei ryngkat ka jingsakhi lang jong ki nongkitkam ka Synjuk ki Seng Longkmie Katholik, Central Body, ki seng longkmie na ki san tylli ki Parish ba kynthup ïa ka Pynthorumkhrah, Laitumkhrah, Nongthymmai, Nongmynsong bad Mawpat.