Nang bun kiba pang bampong ka jylla, bun kiba pang ki la phah sumar ha Civil Hospital Shillong

0

Shillong, K’ Lyngkot 17: Ka jaka sumar ïa kiba pang bampong ne ka cancer wing kaba don ha Shillong Civil Hospital mynta ka la dap smam da ki nongpang ha kaba katba dangmih ki sngi nangbun ki briew ki la wan ban leh ïa ka screening bad ban shah sumar naduh ba la plie ïa kane ka Cancer Wing.
Lah ban ong ba ïa kane ka Cancer wing la plie hadien 2 snem bad kata ha u bnai Nohprah, 2022 bad ka don tang kumba 70 tylli ki jingthiah. Kane ka jingpang Cancer la ong ba ka la dei kawei na ki jingpang kaba paw khmat bad kaba la shim ruh ïa ka jingim jong kiba bun ki briew ha kane ka jylla.
Kumta ha kaba ïadei bad kane ka State Cancer Society ka la pynlong ïa ka general body meeting hapoh ka jingïatreilang bad ka Mumbai Tata Memorial Cancer Hospital. Ka jingthmu ba hakhmat eh jong kane ka jingïalang ka long ban thied ïa ki tiar sumar kiba long katkum ka juk mynta kiba kynthup ïa ka high-energy LINAC (linear accelerator) na ka bynta ban sumar ïa kiba pang bampong bad kumjuh ruh ban pynkhlaiñ ïa ki jingtei na ka bynta ka jingdonkam ban ai ka jingsumar ïa kiba pang cancer hapoh ka jylla Meghalaya.
La ong ba ka Tata Hospital ka la long kawei na ki jaka sumar kaba la ai ka jingkyrshan kaba ratbah ïa ki jingpyrshang jong ka jylla ban buh ïa ka jaka sumar bad ki tiar ki tar kiba donkam ha kaba ïa kane la buh ha Shillong Civil Hospital.
Ïa kane ka jingïalang la pynïaid da u Sampath Kumar, chairman ka State Cancer Society and Principal Secretary ka Health Department, ha ka jingdonlang u Dr Nalin Mehta, Director ka NEIGRIHMS bad kiwei kiwei.
“Ka jingïalang ha kane ka sngi la ïakren halor ki kam ban pyntreikam ïa ki tiar ki tar kiba ïadei bad ka jingsumar ïa kiba pang cancer,” ong u Kumar. “Ngi la bishar bniah ruh halor ki jinglong jingman jong ka jaka sumar kaba la long ha kine ki por kiba mynta khamtam ha kaba ïadei bad ka cancer hospital. Da ka jingpynlong ïa ki prokram pynsngewthuh paidbah ka la pynlong ïa kiba bun ban wan phah khmih bniah bad kumjuh ruh ban lap kloi ïa ka jingdon jong kane ka jingpang ha ka met jong ki bad kumjuh ruh ban ïoh ki lad jingsumar kham kloi.”
Na ka liang u Kumar u la ong ba kane ka jingwan ki paidbah ban leh ïa ka screening ka dei ka dak ka shin kaba bha naba ka ïarap ïa ki nongpang ban ïoh ka lad ban tip kloi lada ki don ïa kane ka jingpang cancer.
Na ka liang utei u heh ophisar u la ïathuh ruh ba ka sorkar ka dang pyrkhat ban pynheh shuh shuh ïa ka jingdon jong ki jingthiah ha kane ka jaka sumar. “Ngi dang trei shitom ruh ban pynheh ïa ki jingpyrshang ban leh na ka bynta ka screening khamtam kiba dei ha ki bynta jong ka ryndang bad ka shadem ha kaba ki briew ki ju ïoh bha ïa ka jingpang bampong, ha kaba ha ka jingïalang la ïasyllok bha halor kine ki bynta.”
U Kumar u la ïathuh ruh halor ka jingdonkam ban phah hikai ïa ki doktor ban lah sumar kyrpang ïa kane ka jingpang. “Ngi la kyrpad ïa ka Tata Memorial Institute ban ai ki jinghikai halor ka medical oncology, naba ka jylla mynta ka duna halor kane ka medical oncologist. Ki la mynjur bad ngin sa jied ïa ki doktor ba kin leit shah hikai la kumno kumno ha ki 6 bnai ne hapoh ka shisnem. Ngi la don ruh ka jingïasyllok halor ka jinglah ban ïoh ïa ka Teleconsultation halor ka medical oncology, ha kaba halor kane ki dang pyrkhat bad ïakren.”
“Ha ka jingïalang la ïakren ruh halor ki sienjam ban khmih bniah ba don ka jingïadei ka jingpang bampong bad ki jingmlien ba manla ka sngi kum ka jingbam ïa u kwai kaba long ka daw jong kane ka jingpang ne oesophageal cancer. Ka jingpang bampong ka ju jia bha ha ka khlieh bad u ryndang kiba paw bha ha kane ka jylla. Kumta la buh ïa ki Endoscopy unit ha manla ki district bad la hikai ruh ïa ki doktor ban lap ïa ki dak ki shin kiba don ki jingma bad ki jingmaham,” u la ong.
Na ka liang u Kumar u la ong ba ka kam la ïaid na ka bynta ban leh ïa ka screening halor ka cervical cancer ha kane ka jylla. “Dangshen ki doktor ki la lap ïa ka jingpang bampong ha ki bynta jong ka ryndang kaba la poi ha ka kyrdan kaba 4. Hynrei lada la lap kham kloi kan lah ban iarap ha ka ban ai ki lad jingsumar kiba bha bad treikam,” u la kynthoh.
Ha kawei pat ka liang u Dr Mehta u la ïaroh ïa ka jingangnud jong ka sorkar jylla ban ïakhun pyrshah ïa ka jingpang cancer. “Ha ka jingïalang la mynjur ban buh bad tei ïa ki high-energy LINAC machine, kiba dei ki kor sumar kiba paka bha ha kaba ïadei bad ka jingleh bad pyndonkam hapoh ka radiation therapy. Kane kadei ka sienjam kaba kongsan ban pynbha ïa ka lad ai jingsumar ïa ka cancer ha Meghalaya,” u la ong.
Na ka liang u Dr Mehta u la ïathuh ruh halor ka jingdon bynta jong ka NEIGRIHMS da kaba ong ba kane ka jaka sumar ka la ai ka jingshakri kaba bun bha ïa ki nongpang bampong, kiba kynthup ruh ïa ki nongpang ba la phah da ka sorkar jylla. “Ngi la ïatreilang kum ka kynhun ban ïakhun ïa kane nongshun ka cancer. Ka sorkar jylla ka la leh ruh ïa ka bynta kaba bha tam da kaba pynlong ïa kiba bun ki screening programme,” ong u Mehta.

Leave A Reply

Your email address will not be published.