Nalor ka kam lajong, ka jingaikam ïa ki samla ka dei kaba nga sngewtynnad eh: Ngaitlang Dhar

Nongpoh, Jymmang 15: U Myntri Rangbah ka jylla u Conrad K Sangma ryngkat u Bah Prestone Tynsong bad u Bah Sniawbhalang Dhar kiba dei ki Symbud Myntri Rangbah, ki Myntri Sorkar jylla, ki MLA bad MDC ki ophisar sorkar naka district mynta ka sngi kila hiar sha ka shnong Narbong haka thaiñ Byrnihat ban leit plie paidbah ïaka karkhana shna Ply Wood jong u Ma Ngaitlang Dhar bala tip kum ka Dhar Ply.
Katei ka karkhana ka long kawei naki karkhana kaba heh haka jylla kaba lah ban pynmih bun tylli ki jait ply wood ki ba lah ban pyndonkam haki jingdonkam bapher bapher kiba yn sa shalan wat shabar ka jylla, bad kane ka long ka jingsarong kaba khraw ïaka jylla ba u riew shimet na kane ka jylla u lah ban shna ïa katei ka karkhana kaba biang pura naduh ki tiar bala dep pynmih haka rukom kaba janai bad kaba lah ruh ban ai kam aijam ïaki spah ngut ki samla.
Haba kren ha kane ka sngi naka liang u Ma Ngaitlang Dhar kum u trai katei ka karkhana u la ong ba naduh mynshuw u la sdang ïaki jait kam bapher bapher hynrei u dap da ka jingsngewkmen kaba khraw pat bala lah ban seng ïa kane ka karkhana khlem ka jingïarap ne kyrshan jongno jongno hynrei tang shi iing shi sem bad dap ruh da ka jingsngewkmen ym tang ban kamai pisa na katei ka karkhana hynrei ban pynroi ïaka karkhana bad ban aikam aijam ruh ïaki samla bad kum ka iing ka sem ki dang angnud ruh ban dang pynroi shuh shuh ïaki karkhana.
Naka liang u Conrad K Sangma bad u Bah Prestone Tynsong haba kren ha kane ka sngi kila ai ka jingïaroh ïa u Ma Ngaitlang Dhar u la rah ïaka nam bad ka burom jong ka jylla ban ïakop bad kiwei kiwei ki briew kiba nabar ha kaba ïadei bad ka jingsem kam bad ki kam business namar katei ka karkhana ka dei kawei naki karkhana kaba heh bha haka jylla kaba la shna haka rukom kaba paka bad ki tiar kiba yn sa pynmih kin sa long kiba janai bad lyngba kane ka karkhana kan long ruh ka jingmyntoi kaba khraw ïaka jylla ha kaba ïadei bad ka roi ka par, ka iohkam iohjam ki khun samla bad ka jingkiew shaphrang bad shakhmat ka jylla bad kan long ruh ka jingkyrshan ïa kiba bun ki longiing longsem.
Kila ai ruh ka jingïaroh ba wat hapdeng shibun ki jingeh bad ki jingtynjuh u Ma Ngaitlang u iengskhem ban trei ïaka kam ban jam shaphrang bad ka jingtreikam kala ïaryngkat kyrdan ruh bad ki nongsengkam na kiwei kiwei ki jylla, nakata ka daw ki karkhana ki long kiba donkam ban kyntiew ïaka ioh ka kot ka jylla, ka jingioh kam ki samla ryngkat ka jingai mynsiem ïa u Bah Ngaitlang ba un dang kiew shaphrang bad shakhmat ban long ruh ka nuksa ïaki nongsengkam haka jylla bad shabar jylla, kila bynrap.