Pynlong ka Ophis jong u Accountant General ïa ka Pension Adalat, ka sienjam halor baibam tymmen
Shillong, Jymmang 15 : Ka ophis jong u Accountant General (A&E), Meghalaya, Shillong, ha ryngkat ka jingïatreilang bad ka Tnad Finance (Pension Cell) jong ka sorkar Meghalaya, ka la pynlong ïa ka Pension Adalat ha ka 14 tarik Jymmang, 2026, ha ophis Deputy Commissioner, West Jaiñtia Hills District, Jowai.
Kane ka sienjam ka long ban weng ïa ki case ba ïadei bad ka bai bam tymmen kaba la sahteng la slem kiba ïadei bad ki ophis Sorkar Jylla kiba hap hapoh ki district West Jaiñtia Hills bad East Jaiñtia Hills bad ban pynsuk ïa ka jingpynbeit kloi ïa ki.
Ha ka jingai jingkren, u Rupak Saha, Senior Deputy Accountant General, u la ong ba ka Pension Adalat kadei ka sienjam kaba shimkhia ban pynthikna ïa ka jingpynbeit ha ka por kaba biang ïa ki jingeh kiba ïadei bad ka bai bam tymmen bad ban pynbha shuh shuh ïa ka rukom pynïaid ïa ka kam bai bam tymmen ha ka Jylla. U la ban jur ruh ïa ka jingdonkam ban kyntiew ïa ka jingsngewthuh hapdeng ki Drawing and Disbursing Officer (DDO) ha kaba ïadei bad ka jingphah online ïa ki case bai bam tymmen ha ka rukom kaba pura lyngba ka ‘e-Pension Portal’, kaba la plie paidbah da ka ophis ha u bnai Kyllalyngkot 2026.
Ha kane ka jingïalang la ïashim bynta da ki Drawing and Disbursing Officer (DDO) ba dei khmih, ki nongïoh bai bam tymmen, bad ki ophisar kiba dei peit ïa ki case bai bam tymmen na ki tnad treikam bapher bapher jong ka Sorkar Jylla.
Ha kane ka Adalat, la peit ïa kawei pa kawei ka case ba dang sahteng bad la ai jingbthah ba donkam sha ka Tnad pla tyngka bad ki DDO na ka bynta ban pynbeit ïa ki kam kiba eh katkum ki kyndon ba ïadei bad ka bai bam tymmen kiba la don lypa. La ïohi ba ka jingpynslem ban pynbeit ïa ka bai bam tymmen ha ki katto katne ki khep kadei namar ka jingbym don ki kot ki sla bad ki phorm ba ïadei bad ka bam bam tymmen, ki bym shym la ai da ki nongshim bai bam tymmen ha ka por ba ki dang trei.
Ïa kane ka sienjam la ai jingïaroh da baroh kiba don bynta ha kane ka kam kum ka jingpyrshang kaba bha ban pynbeit ïa ki jingeh bad ban kyntiew ïa ka jingtreikam, ka jinglong shai, bad ka jingtreikam kaba bha ha ka jingpynïaid ïa ka kam bai bam tymmen ha Meghalaya.