Nongstoiñ, Jymmang 13: Ka ïew Markasa ka dei ka ïew kaba la rim bha kaba don ha rud ka surok National Highway 44 (E) Shillong-Tura kumba ar phew kilomitar shuwa ban poi ha Nongstoiñ. Watla katei ka ïew ka hap hapoh u pud u sam jong ka Hima Myrïaw, hynrei ka hima kam don bynta ei ei ha kaba peit ne khmih ïa ka jinglong jingman ka suk ka saiñ bad ka jingïaid beit ïaid ryntih jong katei ka ïew, namar la pynïaid da ki riew shimet, kata ka long katkum ka jingïathuh u bah Sranly Marweiñ uwei na ki riew tymmen.
U Bah Sranly haba ïakren bad u nongthoh khubor, u la ïathuh ba ha ki por ba mynshuwa ka ïew Markasa ka dei ka ïew kaba dap tang da ki jinghuri hura suda bad ki paidbah nongwan ïew wan hat ruh kim da sngew shngaiñ, ki dap da ka jingsheptieng bad man ka sngi ïew tang hapoh lai baje nohphai sngi, ki paidbah nong wan ïew wan hat ki la ïa pra bad phet krad la ka jong ka jong namar ka jingbun jong ki nongdie kyiad beaiñ, ki nongbuaid bad ki nongïa khalai.
U la ïathuh ruh ba ha u snem 1978 ma u bad u (L) bah Lobendri u kpa jong ka kong Irin lyngdoh MLA barim ka Parïong, ki la lum ïa ki riew rangbah jong ki shnong kiba don ha katei ka thaiñ ba kynthup ïa ka Nongkasen, Markasa, Mawroh bad kiwei kiwei ki la ïakynduh lang ha Markasa bad ki la ïa pyrkhat kumno ban rat dyngkhong ïa kitei ki kam beaiñ, khnang ba ka ïew ka hat kan ïaid beit bad ki paidbah kin ym tieng ne smiej haba ki wan ïew.
U la ïathuh ruh ba hadien ba la ïa pyrkhat sani bha ki la ïa mynjur lang ba kin leit ban ai da ka jingthoh sha u Deputy Commissioner ka West Khasi Hills, ha kaba u Deputy Commissioner u la phah da ki pulit ha kaba kitei ki pulit ki la wan bad ki la kem naphang ïa ki nongïa khalai, ki nongdie kyiad bad ki nongbuaid bad kitei ki pulit ruh haduh shi snem kynthih ki la wan lynter man la ka sngi ïew Markasa ban kem ïa ki.
Hadien ba ki la leh kumta ka la mih ka jingbyrngem byrsit na ki nongdie kyiad bad ki nongïakhalai, ha kaba baroh ki riew rangbah kiba la ïa don bynta lang ha kaba sdang ïa katei ka kam, ki la sheptieng bad ki la iehnoh noh bad ki la khynñiat ruh ba dei u bah N.S.Marweiñ bad u (L) bah Lobendri kiba phah wan ïa ki pulit.
U la ong ba ka jingshah byrngem ka nang jur hynrei ma ki baroh ar ngut ki la rai rangbah ban ïakhun beit haduh ban da lah ban pynduh khoit ïa kitei ki jingsniew bad ki la rai ruh ba wat lada ïap ruh kin ym sheptieng na ka bynta ka jingbha jong ki paitbah nongwan ïew wan hat.
Kumta da ka jingshlur bad shynrang mynsiem jong ki, ka jingialeh ka la neh da ki bun bun snem bad ha kaba khatduh ki la jop thiaw ha kaba baroh ki nongdie kyiad, ki nongïa khalai ki la duh jait syndon bad la kumba lai phew snem tam haduh mynta, ka ïew Markasa ka dei kawei na ki ïew kiba suk ba saiñ bad ka bym don shuh kano kano ka huri hura lane ka jingiakhalai ne die kyiad beaiñ. Ki nongwan ïew wan hat ki la suk bad hun ka mynsiem kim don shuh kano kano ka jingsheptieng wat ha ka miet ka ïong ruh.
