Kyntu ki lai shnong ka Mawshynrut ïa u MLA ban wanrah ïa ki song pynroi

0

Nongstoiñ, Jymmang, 13: Ki dang don shibun bha ki shnong ki thaw khamtam eh ha West Khasi Hills, kiba dang sahdien ha baroh ki liang la ka long ha ka lynti syngkieng, ka koit ka khiah, ka pule puthi, ka kamai kajih bad ka ïoh ka kot.
Katkum ka jinglum jingtip jong u nongthoh khubor, la lap ba haduh mynta hi ki dang don haduh kumba 70% ki shnong kiba dang sahdien tasam, khamtam eh ha ki thaiñ nongkyndong.
Ha ka jingleit jurip ba dang shen ïa ki katto katne tylli ki shnong ba kynthup ïa ka Kyndongei, Mawkapiah bad Nongrim Hills, kiba hap ha ka Mawshynrut C&RD Block Rambrai Jyrngam Constiuency, la lap tyngkreiñ ba ka sorkar ka la iehnoh beiñ ïa kitei ki shnong, namar ka surok kaba dang shu dep shna shen ruh ka poi tang harud shnong Kyndongei.
Kumta na ka liang ki paidbah ki la kyntu ia u nongmihkhmat ba u dei ban peit ban jngoh lem halor ki jingdonkam kiba bun, kiba ki nongshong shnong ki donkam ha ka jingiadei bad ki kam pynroi pynpar.
Haba phai sha ki skul pule, kitei ki lai tylli ki shnong ki don lai tylli ki skul ba kynthup ïa ka Government L.P.Skul ha Nongrim Hills, kawei ka L.P.Skul jong ka Balang Catholic ha Mawkapiah bad kawei ka L.P. bad U.P skul ha Kyndongei kaba la seng da ki hynñiew ngut shipara kiba la ai kyrteng ka ‘Ïatylli Lang Shipara L.P. & UP skul.
Haba ïakren bad ki nongpynïaid jong ka Ïatylli lang Shipara L.P.Skul, ki la pynpaw ïa ka jingsngewkhia halor ka jingbuhteng jong ka sorkar ban ai jingïarap ïa katei ka skul.
Ki la kren bynñiaw ruh da kaba pyni ïa ki kot ki sla kiba ka sorkar lyngba ka Office jong u District Mission Coordinator West Khasi Hills ka la kular. Hynrei haduh mynta khlem pat urlong satia bad ka la shu long tang kum ka khleiñ ba la thang hynrei jwat pat ban bam.
La lap ruh lyngba ki jingthoh kiba ka sorkar ha ka shithi kaba Dt 25th November 2010 kaba don ïa u No.MEGH/SSA/SMAM/PL/42/2010/243, kaba la kdew shai ba katei ka skul ka la don ka hok ban ïoh ïa ka jingïarap. Hynrei haduh mynta kam shym pat la leh ei ei ruh em.
Ki nongpynïaid jong Ïatylli lang shipara, ki la ong ba lada ka sorkar ka shu pynshlur tang ka ktien ïa ki Nongkyndong ban seng ïa ki skul, da kaba ong ruh ba ka SSA ka dei ka mission kaba don ïa ka jingthmu ban rat dyngkhong ïa ka jingbiej, kam don jingmut satia.
Namar, lada ka shu bun tang ki jingkular khlem pyntreikam, kan poi ka por ba ki heh sorkar kin bun kam satang ha kaba leit khang tala ïa ki skul, namar ba ki nongseng skul kim shym la seng da ka mon la jong. Hynrei dei da ka jingpynshlur ka sorkar bad haba kim lah kyrda shuh ki hap ban khot ïa ki heh sorkar ban leit khang.
Ha kiba bun ki khep ki nongshong shnong ha ka thaiñ Mawshynrut ki shu iai shah ia ki jingshah ieh beiñ ha ki nongmihkhmat watla ki jied da ka jingieid bad ka jingshahniah.
Ha kane ka kynti ki la pynpaw ia ka jingshah niah ha u nongmihkhmat uba mynta u Bah Methodius ba un leh eiei ia ka dong ka thaiñ baroh kawei naba ka HSPDP ka dei kaba iatreilang hapoh ka Sorkar Meghalaya Democratic Alliance (MDA) ba la ialam da ka National Peoples Party (NPP).
“Ngi kyntu ia u MLA ba un pynsngew ia ki jingsahdien jong ka thaiñ hakhmat ka sorkar khang ba ki song pynroi kin wan shapoh ka Mawshynrut Constituency kaba sahdien tam ha ka jylla,” ong ki paidbah.

Leave A Reply

Your email address will not be published.