Nongstoiñ, Jymmang, 13: “Ka jingkhih khohreh jong ki paidbah ka jylla kiba shong ha ki shnong khappud ban dawa ïa ka sorkar ba kan pynkhlaiñ ïa ki bor pahara ban ïada na ka jingshah thombor ha ki pulit jong ka jylla Assam kan ym poi shano shano ruh”, ong u Bah T.Marweiñ na Nonglang West Khasi Hills.
U la ong ruh, “Kiba tip ïa ka daw tynrai jong ka jingtlot jong ki bor pahara jong ka jylla Meghalaya ki don da ki hajar, hynrei kim ju sei madan ïa ki jingshisha ba ki tip ha khmat ki paidbah. Nalorkata ki don ruh shibun ki nongmihkhmat ki bym tip ei ei shaphang kitei ki jingshisha kiba pynlong ïa ka jylla Assam ba kan kyntur pud katba ka mon”.
U la ong ruh, “Ki katto katne ki bynta kiba ka Meghalaya kam nud ban ai bor pura ïa ka tnad pulit ba kin treikam kat kum ki kyndon ba la pynkhamti ha ki, ka dei namar ba ka tnad pulit jong ka jylla Meghalaya ka dang hap ban treikam katkum ki kyndon jong ka Joint Cadre ryngkat bad ka tnad pulit jong ka jylla Assam”.
U la ong ruh, “ym lah ban len ba lada ki pulit jong ka Meghalaya wat lada ki dei kiba heh kyrdan katno katno, kim nud ban saham ei ei hakhmat jong ki pulit Assam wat la ki dei kiba rit kyrdan ruh. Hynrei ka jingburom jong ki ka dei tang namar ba ka don ka discipline kumba ki la smai ha ka por ba ki pyndep ïa ka jingleit pyntbit jong ki”.
“Kumba ka long haduh mynta ka Meghalaya kam pat don satia la ki jong ki heh pulit kiba dei ha ka kyrdan Indian Police Service (IPS) hynrei ki hap ban shim ïa kiba dei na ka Assam Batch. Ki heh pulit kiba ka jylla ka don haduh mynta ki dei tang kiba don la pyndep ïa ka kyrdan Meghalaya Police Service (MPS). Dei halor katei ka nongrim ba haba don kino kino ki huri hura bad ki jingïakajia ha khappud, ki pulit Meghalaya kim nud ban tur pyrshah ïa ki pulit Assam ban ïa ai nia pyrshah ïa ki”.
“Kiwei pat ki bynta ba ka Meghalaya ka dang hap ban bud ryntih ïa ki kyndon ba ka sorkar Assam ka pyntreikam ka dei ha ka thungkam thung jam, ka jingpynbit pynbiang ïa ki kot ki sla kiba don kam lyngba ki Assam schedule bad kawei pat ka dei ka aiñ khlaw”.
“Ki jingshisha ha kaba ïadei bad ki aiñ khlaw kiba ym pat don mano mano kiba sei madan ïa kitei ki jingshisha, hynrei kumba ka long haduh mynta ka jingkyntur pud jong ka sorkar Assam ïa ki bynta jong ka Meghalaya, ka dei halor ka nongrim ba ka kam ba kitei ki jaka ki dei ki Reserve Forest da kaba kam ruh kiba katkum ki kyndon jong ka Minstry of Forest ym ym shah satia ban shong briew ha kitei ki jaka kiba hap ha ki bynta jong ki reserve forest”.
“Ka sorkar Assam ka la knieh jubor ïa ka ïing ba u (L) bah Hopingsone Lyngdoh u la thied ha Langpih na ka bynta ba ka hima Raidmynsaw kan pynlong kum ka ophis, hynrei ka sorkar Assam ka la knieh jubor bad pynshong da ki Forester haduh mynta. Ka long pat kaei kaei ka bym lah ban pdiang ïa ka jingkam jong ka Assam, namar ha baroh ki jaka khappud ki khlaw ki la lut khoit, ha kaba ki pulit ka Assam bad ki forester bad ki nong khaïi dieng kim salia ban pynsynlen ïa ki khlaw”, u la ong.
