Jowai, Jymmang 13: Ka Trained Nurses Association of India, West Jaiñtia Hills Unit hynnin ka sngi kala rakhe ïa ka kyrpang jong ki kaba la tip kum ka ‘Nurses Day’ ba la pynlong ha Presbyterian Higher Secondary School, Modop, Nartiang halor ka phang “Our Nurses, Our future”. Ïa kane ka sngi la ju rakhe ïaka manla ka snem ha ka 12 u Jymmang ban leh burom halor ki kam ba la synñiang da ki nongtrei Nurses.
Ha kane ka sngi u ma Wailadmiki Shyllla, MLA 2-Jowai Constituency ula long kum u kongsan, ha kaba Dr. A.M Paswett, District Nodal Officer, District Mental Health Programme kum symbud kongsan ha ka jingdonlang Dr. R. Pohsnem, Sr M.O, I/c Nartiang PHC nalor kiwei de. Hashwa ban sdang ka jingïalang na ka liang u kongsan jong kane ka sngi ula thang ïa ka sharak bad la don ruh ka jingrwai kyrpang ‘Nurses Anthem’ ba la ïalam da ka I. Dhar, Assistant Nursing Superintendent Woodland W.K Hospital, Sabahmuswang.
Haba ai jingkren u ma Wailadmiki Shylla ula ai ka jingïaroh ïa baroh ki Nurses kiba la aiti met bad mynsiem ban ai ka jingshakri kaba bha tam ha ka liang ka koit ka khiah sha kiti kiba donkam jingsumar, ula ïaroh kumjuh ïa ki Nurses kiba la shim ïa kane ka kam kaba ha khmat eh ban ïarap ïa ki nongpang. Ha ka juh ka por u kyntu ba kin long kiba bah ha ka jingshakri da kaba pyni ïa ka khmat phuh samrkhie bad ka jingieit.
Ula ong ba ka sorkar MDA ka don ka thong ba hakhmat eh ban pynbha shuh shuh ïa ka rukom ai jingsumar ha ka koit ka khiah hapoh ka jylla da kaba pynbha ïa ki jaka ai jingsumar bad ki tiar ki tar kiba donkam baroh ki jaka sumar sorkar.
Ha ka juh ka por ula pyntip lyngba ka National Rural Health Mission la don ar tylli ki Urban Health Centres kiba la dep ban mang (sanctioned) kata kawei ha Iawmusiang bad kawei ha Mihmyntdu bad ka jingdon kine ki UHC kan ïarap shibun ïa ki paidbah nongshong shnong ban leit shim dawai.
Na ka liang ka Dr. R.Pohsnem, Sr M.O, I/c Nartiang PHC kala kren halor ki kam ba bha kiba sah jingkynmaw lyngba ka jingsynñiang ki nongtrei Nurses ha ka koit ka khiah jong kiba bun ba lang.
Ka kong Phiralin Kharongor, Associate Professor North Adventist College of Nursing ha ka jingkren kaba batai khyndiat halor ka phang jong kane ka jingrakhe ïa ka sngi ki Nurses.
Katba na ka liang ki kynhun jong ka Nurses Association kila shim ruh ïa ka lad ban pynkup burom ïa ki nongtrei Nurses kiba la shongthait na ka kam. Ha kane ka sngi la ïoh ïa ki kyntien pdiang sngewbha da ka kong T. Lapasam, CHO Nartiang PHC bad ki kyntien ai khublei da ka kong S. Suchaing, Ward I/c Jowai Civil Hospital Ialong. Ïa ka jingïalang la pynïaid da ka kong I. Pohktai PHN O/o DMHO, Jowai.
