Naduh 3 tarik jah rngai u Bah Mewari, khlem pat lapdien haduh mynta, sngewkhia ka MCTODA

Shillong, Naitung 13: Ka seng Meghalaya Commercial Trucks Owners And Drivers Association (MCTODA) ka la pynpaw ka jingsngewkhia kaba jur bha halor ka jingbym lah ban shim khia jong ki artylli ki sorkar jylla ba kynthup ïa ka Sorkar Jylla Meghalaya bad Assam hadien ba u dkhot jong ka, u Mewari O Dkhar uba dei na ka thaiñ Nartiang, Jaiñtia Hills bad uba dei ruh uba ju ñiah kali u la jah noh naduh ka 3 tarik mynta u bnai ha kaba haduh mynta ym pat tip satia shano u don.
Katkum ka jingïathuh jong u Chairman ka MCTODA u Bah Moslander Marngar, nangta u kpa jong u, u Bah Treilem Shylla, ki dkhot ka MCTODA ba kynthup ïa u nongaiktien u Bah Wanshwa Nongdtu, u General Secretary u Bah Peter Marbaniang ki la ïathuh ba u Bah Mewari O Dkhar u la jah naduh ka 3 tarik mynta u bnai bad mar ïa ïoh jingtip halor kane na ka liang ka seng ha ryngkat lang bad ki bahaiing ha sem ki la ialeit wad jingtip bad kumjuh ruh ban ujor da ka ejahar ha Guwahati bad kumjuh ruh ha ri Bhoi.
U Bah Marngar u la ïathuh ba u Bah Mewari udei ruh uba ju ñiah ïa ki trok kit dewbilat na Jaiñtia Hills bad kumjuh ruh uba ju minot bha ïa ka kam.
U Bah Marngar u la kynnoh ruh ïa ka Sorkar Jylla bad kumjuh ruh ka sorkar Assam ba kim lah ban shim khia naduh ka Sngi ba ki la ujor halor ka jingjah noh jong u Bah Dkhar.
Ha kaba ïadei bad kane na ka liang ka seng MCTODA ka la pynpaw ba kan ïai buddien ïa kane ka kam tad haduh ba u para dkhot jong ki un wan phai sha ka ïing.
Na ka liang jong u kpa jong u, u la kyrpad ïa la u jong u khun ban wan phai noh sha la ing naba ki khlem buh jingsuba sniew eiei ïa u bad kumjuh ruh u la kyrpad ïa ka Sorkar jylla, lyngba u Symbud Myntri Rangbah ka jylla u Bah Sniawbhalang Dhar ba un shimkhia lem ïa kane ka kam.
Na ka liang ka MCTODA ka pynpaw ruh ba bun sien haba jah ki briew na Meghalaya shabar jylla ym ju kham ïoh jingtip shuh satia, hynrei ka pynpaw pat ka jingkyrmen ba u Bah Mewari O Dkhar un phai noh sha la ka ïing ka sem da kaba suk ba saiñ.
Shuh u Bah Moslander Marngar u la pynpaw ruh ka jingsngewkhia ba ki company bad nabar jylla kiba pynïaid ïa ki trok kit dewbilat kim ju shimkhia ïa la ki jong ki nongbylla kumba long ïa u Bah Mewari O Dkhar uba ñiah ka trok jong ka FTA kaba ym lah satia ban tip pura ïa ka jaka treikam jong ki.
Shuh shuh ha kaba ïadei bad kane na ka liang ka seng ka la pynpaw ba ka lah ban don kaei kaei kaba sha lyndet hynrei kam lah pat ban ong ïa kane ka jingjia naba haduh mynta ym pat lap satia ïa u bad na ka liang ka seng ka shu kyrpad ïa ka sorkar jylla ba kan shim khia ha kaba ïadei bad kane ka bynta khnang ba kan long ka jingmyntoi ïa kiba ñiah trok kiba mad ïa kane ka jingeh.