Naba khlad I Khyllung ha kpoh ka kmie, kynnoh ka Longïing ba ka dei na ka jingai dawai BP ka CHC Bhoirymbong
Nongpoh, Nailar 18: Kawei ka Longïing jong ka Kong Liza Marry Marbaniang kiba shong bas ah ha ka Shnong Mawpun Kshaid ha Ri Bhoi mynta ka sngi ki la pynmih ïa ka jingkynnoh ba kawei ka Longkmie ka la duh noh ïa la Ikhun hadien ba la kha, kaba dei tang na ka daw ka jingjur palat ka jingai dawai BP da ki bor pynïaid ka Bhoirymbong CHC hadien ba katei ka Longkmie ba armet ka la leit ban shah sumar ha katei ka jaka ai jingsumar.
Kumba la pyntip da katei ka Longïing jong ka Kong Liza Marry Marbaniang, la ong ba katei ka Longkmie ba armet la rah noh ïa ka sha CHC Bhoirymbong naduh ka 14 tarik u Nailar, 2022, kaba dei hadien ba la suh ban kha khun, hynrei la kynoh pat ba ha kane ka jingthmu ban leit shah sumar ïa ki Doctor na ka bynta ban kha ïa I khun, la kynnoh ba ki bor pynïaid ki la pyndih bun da u Dawai BP ha kaba hadien ba la khan noh ïa I khyllung itei I khyllung I la khlad noh.
Kawei na kiba haïing katei ka Longkmie ba armet, ka Kong Matilda Marbaniang kaba dei ka Meideng jong ka Kong Liza Marry bad ka hynmen ka Kong Rubinica Marbaniang, haba kren sha ki lad pathai khubor, ki la ïathuh ba ka Kong Liza Marry Marbaniang ka la sdang ban suhkha naduh ka meit jogn ka 14 tarik u Nailar 2022 bad dei ha katei hi ka miet la rah noh ïa ka sha CHC Bhoirymbong na ka bynta ban shah sumar lyngba ki Doctor ban kha ïa itei I khyllung.
Kitei ki ba haïing ki la ïathuh ruh ba hadien ki Doctor ki la peit bniah ïa kane ka Longkmie ki la pyntip ba kane ka Longkmie ba armet ka donka jingkiew BP bad tang namar ba don BP ki la shu ai haduh 3 tylli u dawai BP naduh katei ka miet khlem da peit ne bishar bha ïa I Khyllung, hynrei dei haduh ka 16 tarik ba ki bor pynïaid katei ka Hospital ki la phah rah noh sha Shillong ha kaba kiba haing ki la ïalam ban rung noh ha la ïing ha Mawpun Kshaid bad kynsan kynsan kane ka Longkmie ka la khah noh ïa I Khyllung bad iba la khlad noh naduh ka kpoh jong ka kmie, ong kitei kiba haïing.
Halor kane ka jingjia, na ka liang ki Nongtoh Khubor ki la leit ban wad jingtip na u Doctor ba dei peit ïa katei ka CHC ha Bhoirymbong, uba dei u Dr. T. Sutnga bad halor kane ka jingkynnoh katei ka Longing na ka liang utei u Doctor u la kyntait ba kam long kaba shiaha bad ka kane ka Longkmie haba wan rah ha katei ka jaka ai jingsumar ka don ka jingkiew BP ba ïa u dawai BP ruh la ai ban pynhiar ïa ka BP. U la bynrap ruh ba kane ka jingkynnoh ba I khyllung I khlad tang naba ai dawai BP kam lah ban long ha kaba ki bor pynïaid ki la phah rah noh sha Shillong ruh ka dei namar ba la sngewthuh ba la donkam ban shah sumar ha ki jaka ai jingsumar ba kham biang ha kaba kane ka jaka ai jingsumar kam pat biang ki tiar ban puid kumba long lem kiwei kiwei ki ja ai jingsumar kaba la biang ki tiar ki tar.