Mih sa kaka Synjuk ki Rangbah Shnong Ri Bhoi District ban pyrshah ïaka ktem khalai ha Ri-Bhoi

Nongpoh, Nailar 17: Tang hadien ba ki nongïalam ka KSU, North Khasi Hills District kila mih shakhmat ban pyrshah ïaka jingwanrah ïaka ktem khalai ha Ri-Bhoi District (Casino), ka Synjuk ki Rangbah Shnong Ri Bhoi Distirct mynta ka sngi ki la pynpaw ïa ka jingpyrshah kaba jur ban wan rah ïa ka Casino ha Ri Bhoi District bad kum ka synjuk da lei lei kan nym lah ban pdiang ïa kane ka Casino kaba la tip shai ba ka dei ka kam khalai kaba ktah ïa ka imlang ka sahlang bad ki longing ki longsem.

            Haba kren sha ki lad pathai khubor mynta ka sngi, U Bah B.B Makdoh, Chairman ka Synjuk ki Rangbah Shnong u la pynpaw ba kum ka synjuk kaba trei na ka bynta ka bha ka miat bad ka roi ka par ki paidbah ha Ri Bhoi da lei lei kan nym lah ban pdiang ïa ka jingthmu ban wan rah ïa ka Casino ha Ri Bhoi bad kum ka synjuk ka sngewthuh shai ba kane ka jingthmu ban wan rah ïa ka Casino ka dei kaba ktah ym tang ïa ka jingjot jong kiba bun balang bad ka ktah ruh wat ïa ka burom bad ka nam jong ka Ri Bhoi District.

            “Ka synjuk kan ïai pyrshah jur lada wan rah ïa ka Casino ha Ri Bhoi” ong u Bah B.B Makdoh bad bynrap ruh ba ka Synjuk kam kwah shisha ban long kata ka District kaba dei ka ktem khalai bad ha ka jaka ba ka sorkar kan wan rah ïa ka Casino ka dei ban wan rah da kano kano ka skul bah kum ka Kolej Sorkar ne kiwei kiwei ki jaka pule kaba long ka jingmyntoi na ka bynta ki khun samla ka dong Ri Bhoi” u la bynrap.

            Shuh shuh, u la ong ruh ba ka synjuk ka dawa na ka sorkar jylla ba ka dei ban sngap ïa ka sur jong ki paidbah babun balang ban nym wan rah ïa ka Casino ha Ri Bhoi bad kane ka dei ka khubor ba ka synjuk ruh ka pyrshah jur bad ka dawa ban sangeh ban wan rah ïa ka Casino ha kaba lada ka sorkar ka dang leh mynthi khlem da burom ïa ka sur jong ki paidbah kum ka synjuk ruh kam banse ban shim da kiwei ki lad ki lynti ban ïa pyrshah ïa kane ka ktem khalai ba la tip ha ka ktien Nongwei Casino, U la bynrap.