Na u DC-EJHs.District dawa ki trai jaka ban pynsangeh mardor ïa ka public hearing ka MSPCB

Khliehriat iaiong 22 : Ki trai jaka kiba dei na Shnongrim kaba hap hapoh elaka Nongkhlieh East Jaiñtia Hills District, ba kynthup u bah Bunlangki Sukhlain, bah Prince Sukhlain, bah Sonyborn Pyrngap, bah Arwon Sukhlain bad kiwei kiwei mynta ka sngi ki la leit iakynduh ïa u Deputy Commissioner ka East Jaiñtia Hills District, u Manish Kumar, IAS bad ki la buh ruh da ka jingthoh, ha kaba ki la dawa na ka ophis u DC ba u dei ban pynsangeh noh mardor ïa ka Public Hearing ba la khot pynlong da ka Meghalaya State Pollution Control Board kaba na ka bynta ka jingthmu ka company M/s Shree Cement Limited ban khlong ïa u mawshun.
Katkum ka shithi, ki trai jaka ki la ong “ ngi kiba dei ki nongshong shnong jong ka shnong Shnongrim, Elaka Nongkhlich, East Jaiñtia Hills District, ba la soi kyrteng harum, ngi wan ban ujor bad pyntip sha phi ba ngi pyrshah ïa ka jingthmu ban tih mawshun ha Lum Syrman, Elaka Nongkhlich bad hadien ba ngi la iohi ïa ka public notice jong ka Memo: No MPCB/TB-360/2026/SCL (Block-A)/EJHD/2026-27/4-A, dated: 17th April 2026, ba ka M/s Shree Cement Limited ka la kam trai bad don jiingthmu ban tih ïa u mawshun na ka tei ka jaka ka ba heh kumba 217.394 Hectar, kumba la thoh kyrteng Lum Syrman Limestone Block-A bad kumjuh ban tei lane buh ruh ïa ka Primary Lumshyrman Limestome Crusher bad Secondary Crusher khlem da ioh jingbit na ngi ki trai jaka. Te kumta ngi kyrpad ïa ka ophis ba don burom jong phi ba phin sngewbha ban pynsangeh mardor ïa kane ka public hearing kumba la kdew ha ka public notice Namar haduh mynta ngi dang long trai ma ngi ïa ka tei ka jaka bad ngi don ruh la ki kot ki sla ba biang kumba la pynskhem da ka office jong ka Jaiñtia Hills Autonomous District Council kat kum ki kyndon jong ka aiñ bad ngi don ruh la ki kper ki bri ba ngi ju rep naduh ki por hyndai ba la ai pateng la pateng bad dei lyngba jong ki ne ki kper ki prah bad ki um ki wah ngi lah ban pyndap ja kpoh ïa ki ïing ki sem jong ngi”.
Ha kajuh ka por kitei ki trai jaka ki kyrpad ïa ka ophis u Deputy Commissioner ka East Jaiñtia Hills District ba un shim khia ïa kane ka kam khnang ban lait na kano kano ka jingklumar hadien habud.
Na ka liang ki trai jaka ki la pynpaw ruh ka jingpyrshah jur ïa ka public hearing bad shuh shuh ha kaba ïadei bad ka jingpynbna ne ka notice ba wan lyngba ka tnat Meghalaya State Pollution Control Board ba la mih ha ki pathai khubor ba la thoh ïa ka kyrteng jaka da ka Lum Syrman Limestone Block-A, na ka liang u bah Bunlangki Sukhlaiñ, u la ong ba kum ki nongshong shnong jong ka thaiñ Nongkhlieh elaka kim ju tip bad kim ju sngew ïa kata ka kyrteng jaka bad kata ka Block-A kam ju don kum kane ka kyrteng jaka hapoh elaka Nongkhlieh, u la kynthoh jur ruh ba kumno ki nud ban pynmih notice nalor ki jaka kiba longtrai da kiwei kiba dang dei haduh mynta ki jaka rep jong ki, u la ong ruh ba kum ki trai jaka ki la sngew kyndit shikatdei eh haba ki iohi ïa ka jingpynbna public hearing ha MSPCB namar na ka liang ki trai jaka kim pat shym la die satia ïa ki jaka sha kano kano ka company.
Kumjuh ruh na ka liang u bah Arwon Sukhlaiñ, uba dei uwei na ki trai jaka u la ong ba ha katei ka jaka ha Lum Syrman ki don bun ki jaka ba ki briew ki rep ki riang bad baroh kiba rep ha katei ka jaka ki la sngew kyndit haba ki iohi ïa ka jingpynbna public hearing, u la buh jingkylli ruh ïa ka tnat Meghalaya State Pollution Control Board bad kiwei kiwei ki tnat kiba ïa don bynta lang ba balei ba ki thoh bad pynpaw ïa ka kyrtang jaka Lum Syrman, namar kum ki nongshong shnong jong ka thaiñ kim ju iohsngew ïa kane ka kyrteng Lum Syrman bad kylli ruh ïa ka Block-A, u la ong ba “naduh mynnon bad mano ban shna ïa kane ka Block bad hato kane ka Block ka sdang naduh nangno shaduh shano? Namar ha ka notice la shu ai kumto khlem sngewthuh sngewthaw, kane ka jingpynbna public hearing kan sa pynpoi ïa ngi sha ka jingsngew klumar ha ka imlang ka sahlang ha ka thaiñ Nongkhlieh, ngi da kyrpad ïa ka sorkar ba kan snhim khia ïa kane ka mat bad hadien ba la pynbeit te ki lah ban ïaid shakhmat”
Ha kaba ïadei bad kane ka jingpyrshah ïa ka public hearing kaba la pynsah umdum ïa ki trai jaka na ka liang ki trai jaka ki la pynkhreh ban leit sa sha ka ophis MSPCB ban pynpaw ïa ka jingpyrshah jong ki ïa kane ka jingthmu ka company Shree Cement Ltd ban khlong ïa u mawshun na katei ka jaka kumba la paw ha ka jingpynbna ne ka notice ba wan na ka MSPCB.