Kyrpad ka Sorkar jylla ïa ka Sorkar pdeng ban siew bailutksan ïa ki trai jaka ba shah ker shabar ka jingker sainar shiah

Shillong, Iaiong 22 : Ka Sorkar Jylla ka la kyrpad ïa ka Sorkar Pdeng ba kan siew bailutksan sha ki trai jong ki jaka kiba hap shabar ka jingker sainar shah ha khappud ka India-Bangladesh,haba shim ïa ka kum ka “kam kaba dei hok” ba ktah ïa ka kamai jakpoh.
Kat kum ka jingong u Symbud Myntri Rangbah ba khmih ia ka kam Pohïing Bah Prestone Tynsong, ki jaka khappud ki bym pat ker sainar ha khappud ka India-Bangladesh ki dang don kumba 50 Km eiei.
“Ngi la pyrshang kat kaba lah ban pynthikna ïa ka jingker sainar noh ha kine ki 50 km tam ne duna. Hynrei, ngi la mad ruh ïa ki katto katne ki jingeh” ula ong haba ïakren bad ki nongthoh khubor.
U ïathuh ba ki trai jaka bad ki Rangbah Shnong ki la pyrshah ïa u pud ban ker sainar namar bun ki jaka rep ki la shah pynhap noh sha ka no man’s land.
“Katto katne ki trai jaka bad ki Rangbah Shnong ki la ong ba lada ka jingker sainar ka hap ïaid na u pud ba buh mynta, kiba bun ki jaka kin hap noh sha ka no man’s land. Lada kane ka long kumta, ka Sorkar India ka hap ban siew ïa ka bai jaka bad wat kito kiba hap shabar jong ka jingker sainar” ula ong.
“Kane ka dei ka jingpyrshah na ki trai jaka. Kane ka mat ka dei ha ka jingshisha ka mat ba dei hok bad ngi la ïakren bad ka Ministry of Home Affairs ban pynsngewthuh ïa ka Sorkar India ba kan ym siew bai jaka tang ïa kito ki jaka ba ker ïa ka jingker sainar shiah hynrei ka dei ban long ruh ïa ki jaka kiba hap shabar ka jingker.Ki hap ruh ban kheiñ ïa kane ka jingduhnong kaba ktah beit beit ïa ka kamai jakpoh jong ki trai jaka bad ki nongshong shnong ka Jylla” ula bynrap.