Nongpoh, Jylliew 29 : Ka Seng Hynñiewtrep Integrated Territorial Organization (HITO), Ri Bhoi District ka la shim ïa ka sienjam ban pynbor ïa baroh ki MLA ka Ri Bhoi District ba ki dei ba ïa tai sani halor ka jingpyntreikam ïa ka Reservation Policy bad ka Roster System na ka bynta ka jingthungkam thungjam ïa ki kam sorkar kiba dei hapoh ka Ri Bhoi District.
Ban pynsngew halor ka jingangnud ka seng, ki nongïalam ka seng Seng Hynñiewtrep Integrated Territorial Organization (HITO) ha ka jingïalam u Vice President, u Bah Alvis Kyrsian ki la leit ban ïa kynduh ïa ki saw ngut ki MLA ka Ri Bhoi ba kynthup ïa u Bah Mayral Born Syiem, MLA ka Nongpoh, u Bah Charles Marngar, MLA ka Mawhati, u Bah Sosthenes Sohtun, MLA ka Jirang, u Dr. Celestine Lyngdoh, MLA ka Umsning bad lait noh u MLA ka Umroi uba kim shym la ioh ban ïa kynduh ha kaba ïa kitei ki MLA kiba ki la ioh lad ban ïa kynduh ki la ai ruh da ka jingthoh halor ki jingangnud ka seng ha kaba ïa dei ba ki jingpyntreikam ïa ka Reservation Policy bad ka Roster system kaba dei katkum ka Office of Memorandum 2023.
Kine ki nongïalam ka HITO ki la leit ruh ban ïa kynduh bad ba ai jingthoh sha kine ki MLA jong ka Ri Bhoi, ka dei halor ka nongrim ba ha ka liang ka thungkam thungjam ha ki District la dei beit ban bhah ïa ki kams sorkar 80% tang na ka bynta ki samla jong ka District.
Haba ïa kren bad ki Nongthoh Khubor, u Vice President ka HITO Ri Bhoi District, u Bah Alvis Kyrsian, u la ong ba ka kane ka jingpynbor ka seng ïa ki MLA na Ri Bhoi ban ïa tai sani halor ka Reservation Policy bad ka Roster System ka dei beit tang ïa ki kam sorkar kiba dei hapoh ka District Selection Committee ba ka sorkar ka dei ban bhah beit 80% ki kam sorkar tang na ka bynta ki samla jong ka District.
Da kaba ai nusksa ruh kino kino ki kam sorkar ha man la ki District ki la don la ka jong ka DSC ha kaba bunsien ki samla na kiwsei ki District kim ju ioh lad ban rungkam bad ha Ri Bhoi District ruh kane ka seng ka kwah ba ka jingbhah kam ka dei beit ban long 80% tang ïa ki samla ka Ri Bhoi District, ong u Bah Alvis Kyrsian.
U la ong ruh lait na ki post kiba hap ha ka DSC ka seng kam kren ei ei bad ka seng ka kren beit tang ïa ki post kiba hap hapoh ka DSC bad lada mih kino kino ki kam lada pyntreikam ïa ka Reservation Policy ne ka Roster System dei beit ban ioh 80% tang ïa ki samla jong kata ka District.
Namarkata, na ka liang ka seng ka khmih lynti ba kine ki MLA ka Ri Bhoi District ruh ki ïa kren sha ka sorkar kumba ka sorkar ka la dep ban thung da kata ka Expert Committee halor ka jingpyntreikam ïa ka Reservation Policy bad ka Roster system bad na ka bynta ka Ri Bhoi ruh dei ban bhah beit 80% ki kam sorkar na ka bynta ki trai District ha kaba ïa dei bad ki post kiba dei hapoh kata ka District Selection Committee, u la bynrap.
