Nongpoh, Jylliew 29: Na ka daw ba la ju mih ki jingjia ba sngewsih bad kawei ruh ka jingleh khlem akor jong kito kiba ju wankai suwari sha ka wah Umtrew ha ka thaiñ Byrnihat ha Ri Bhoi, ka Dorbar Shnong Narbong ka la buh syndon da ki jingmana bad ki kyndon na ka bynta kito kiba wan shangkai suwari sha katei ka wah Umtrew.
Kane ka jingmana ka Dorbar Shnong Narbong na ka bynta kito kiba wan kai suwari sha katei ka wah Umtrew, ka dei namar ba bunsien la ju mih ki jingjia ba sngewsih ïa kito kiba wan na shabar bad kumjuh ruh ka jingpynjaboh ïa ka wah da kaba pynpait bitor bad bret jaboh sha ka wah ba kum ka shnong ka angnud ban sumar ïa katei ka wah bad ruh ban pynlong ïa katei ka wah kum kawei na ka jaka jngohkai pyrthei.
Kane ka wah Umtrew ka dei ka wah kaba ka jylla Meghalaya ka tan bording ilektrik ba la tip kum ka New Umtru Hydro Electric Project (NUHEP) bad dei namar ka jingdon katei ka jaka pynlang um (Dam) ka la khring ïa kiba bun ki briew kiba na shabar ka jylla khamtam na ka jylla ba marjan ka jylla Assam ki paidbah ki tuid ban leit shangkai suwari bad ban pynlong kum ka jaka ïa bam khana.
Haba kren halor kane ka jingmana ka Shnong Narbong, u Rangbah Shnong, u Bah Rongmen Ronghang u la ong ha ka jingshisha ka bor shnong kam don kano kano ka jingpyrshah ban wankai ki briew kiba nabar sha katei ka wah, hynrei ka bor shnong ka buh tang ïa ki jingmana namar la bunsien la ju jia ki jingjia ba sngewsih ha kaba tang mynta u snem naduh u Kyllalyngkot haduh kine ki sngi la don kumba 13 ngut kiba la duh noh ïa la ka jingim tang na ka daw ba kim ju phikir haba wan ban shang suwari sha katei ka wah Umtrew.
U la ong ruh ym tang ba ka bor shnong ka sngewkhia halor ki jingmih ki jingjia ba sngewsih ba bun sien ki dei na ka jylla Assam, hynrei kum ka bor shnong ka sngewkhia ruh ba ka jingwan poi ki briew kiba na shabar ka bor shnong ka sngewkhia ruh ba ki bret pathar ïa ki jaboh, ki pynpait ïa ki bitor kaba long ka jingma ïa ka mariang bad kaba pynsiew dur ïa ktei ka wah bad dei namar kane ka daw ka bor shnong ka la buh da ki jingmana khnang ba kito kiba wan kai suwari ki hap ban don lang ka jingkitkhlieh ban ïada ïa ka khuid ka suba katei ka wah bad ruh ban nym mih kino kino ki jingjia ba sngewsih, u la bynrap.
Shuh shuh, u la ong ruh ba ka bor shnong nangneh shakhmat kan buh noh da ki nongpeit nongkhmih na ka bynta kito kiba wan kai sha katei ka wah bad kum ka bor shnong ruh ka buh da ki kyndon bad ka por haba ki wan sha katei ka wah kito kiba nabar ki hap ban bud ïa ki kyndon khnang ban nym mih shuh kano kano ka jingjia ba sngewsih bad ruh kum kita kiba wan kai suwari kin don ruh ïa kata ka jingkitkhlieh ban ïada kyrpang ïa katei ka wah ba kum ka bor shnong ka angnud ban kyntiew ïa katei ka jaka kum ka jaka jngohkai pyrthei ban kyntiew ïa ka ioh ka kot jong ki paidbah nongshong shnong, u la bynrap.
