Na ka Mawhati C&RD Block, rai ki rangbah ki 10 shnong ban kyrshan pura ïa u kyrtong ka NPP na Umroi

Nongpoh, K’lyngkot 29: Ki Rangbah Shnnong jong ki 10 tylli ki shnoing na ka ka thaiñ Liarbang shaduh sha ka shnong Mawshut mynta ka sngi ki la pynpaw paidbah ha ka jingïalang kaba la long ha ka shnong Khlieh Umstem ba kin ai kata ka jingkyrshan kaba pura ïa u kyrtong MDC ka NPP na Umroi u Bah Rangkynsai Kharbuki, uban ïa khun ha kane ka election MDC na Umroi Constituency.
Kum ki rangbah shnong ki la ïalum lang mynta ka sngi ha ka shnong Khlieh Umstem bad ki la shim kawei ka rai ban ai kata ka jingkyrshan kaba pura ïa u Bah Rangkynsai Kharbuki, u kyrtong ka NPP na Umroi constituency.
Haba kren sha ki lad pathai khubor hadien ka jingïalang, ki Rangbah shnong ba kynthup ïa u Bah Fairly Teron, Rangbah Shnong Khlieh Umstem, u Bah Jeswell Shadap, Rangbah Shnong Umdohthli, u Bah Pius Tado, Rangbah Shnong Liarbang lem bad kiwei kiwei ki rangbah shnong, ki la pynpaw ba ka nongrim kaba ki la shim ban ai ka jingkyrshan ïa u Bah Rangkynsai Kharbuki, ka dei namar ba ka don kata ka jingïatrei lang u MLA ka Mawhati bad u MDC ka Umroi, ba kitei ki shnong ki hap sha Umroi Constituency ha kane ka election MDC.
Ki la pynpaw ruh ba ka dawbah kaba ki la leit ban ai jingkyrshan, ka dei hadien ba ka Mawhati ka la ïoh ïa ka ophis jong ka C&RD Block ha Umsohlait bad ha kane ka jingmih thymmai kane ka ophis C&RD Block, ïa kitei ki shnong la pynhap noh sha Bhoirymbong C&RD Block, kaba dei lyngba ka jingshim khia u Bah Rangkynsai Kharbukhi, uba la leit ban ïa kren bad u Bah Prestone Tynsong ban pynhap sha Bhoirymbong ba ka Mawhati C&RD Block ka la jngai na kitei ki shnong.
Shuh shuh, kitei ki Rangbah Shnong, ki la kyntu ruh ïa ki paidbah nongshong shnong kitei ki shnong ba kin ai ka jingkyrshan ïa u kyrtong ka NPP na Umroi, namar lada ki wan ha ka bor kan kham suk ha ka jingtreikam ba na Mawhati u don u Bah Charles Marngar u MLA ka Mawhati bad na Umroi pat u Bah Rangkynsai Kharbuki, kiba dei na kajuh ka party NPP, ki la bynrap.