Shillong, Lber, 08: Watla ka dei ka samla kaba donsap ha ka kam suhjain, hynrei ka Samla Evadahun Shisha Rani kaba shong basah ha Umpling Dong Umbah, East Khasi Hills District ka don sa kawei pat ka sap iakura ha kaba ka ju leit ban kilan met manla ka janmiet ha Community Hall jong ka shnong Golflink Khliehshnong, Shillong.
Ka samla Evadahun Shisha Rani kaba la pynkhreh bha ialade mynta ka kynti kan sa leit ban iashim bynta ha ka rynsan iakura MMA ka ban sa long ha nongbah Kolkalta, jong ka Jylla West Bengal kaba la tip kum ka Lastman Standing Fight Night-3 ha ka 10 tarik, Lber, 2024 ia kaba la pynlong da ka Sunayana Entertainment.
Nalor ka samla Evadahun Shisha Rani ka ban mihkmat ia ka Legendary Warrior Combat Team ka ban iakhun ha ka kyrdan Straw Weight Category, kiwei pat ki rang iakura MMA ki ban sa leit iashim bynta lang ha kane ka rynsan iakura ki long u samla Feathrel Massar uba sah ha Mawlai mawdatbaki u ban iakhun ha ka Feather Weight Category bad mihkhmat na ka Legendary Warrior Combat Team, u Moderkai S. Kharpuri u ban iakhun ha ka Middle Weight, Co-Main Event u ban mihkhmat na ka Lumshyiap Sports and Cultural Club bad u rangiakura MMA uba pawnam ka jylla u Johny Nongrum u ban iakhun ia ka Main Event.
Kane kan dei ruh ka sien iakura kaba khatduh eh na ka bynta u Moderkai S. Kharpuri ha kaba u la pynbna ba un shongthait noh na ka jingiakura MMA bad ka kynhun ialehkai ka jong u, kan sa leh burom ia u hadien ba la wan phai na ka jingiakhun na ka jylla West Bengal.
