Na ka ‘Disturbed Region’ sha ka roi ka par, ka suk ka saiñ pynkylla dur ka NPP : Conrad

Mendipathar, Rymphang 22 : U National President ka National People’s Party (NPP) Conrad K Sangma hynne ka sngi Balang ula ong ba ka Sorkar ba ïalam da ka NPP ka la lah ban wanrah ïa shibun ki kam pynroi, ka shongsuk shongsaiñ ha Ri-lum Garo bad kala lah ruh ban pynkylla ïa ka na ka jingithuh kum ka “Disturbed Area” (jaka ba jur ki jingumsnam) sha ka jaka ba shongsuk.
U Conrad ula kren ïa kane na ka rynsan ïalap elekshon ha Mendipathar bad ong ba ka Sorkar ba ïalam ka NPP ka lah ban pynkylla ïa ka jingmut jingpyrkhat jong ki paidbah halor ka Ri-lum Garo la ka dei ha ka Jylla ne shabar ka Jylla, khamtam ha ka Sorkar Pdeng.
“Ha kine ki 5 snem, ngi la ïohi ïa shibun ki jingkylla bad ka roi ka par. Ka Ri-lum Garo kaba ïoh ïa ka nam kum ka jaka ba jur ki kam ïaumsnam bad kam pyntriem hynrei mynta ki jinglong jingman kila kylla lut bad kala kham bha. Ki briew kila lah ban trei ia ki kam ki jam bad khaïi khlem kano kano ka jingshah pyndik” ong u Conrad.
Haba pan ïa ka jingkyrshan ïa u kyrtong ka NPP na Mendipathar u Marthon Sangma, u Conrad ula ong ba ha Meghalaya, ka sorkar ba ïalam da ka NPP kala shna ïa bun ki surok ha kine ki lai snem haba ïanujor bad ki 30 snem bala leit noh. Ula ong ba jan kot 200 Km ka surok hapoh ka PMGSY la dep ban shna ha kine ki lai snem bad 3.5 lak ngut ki briew ha ki jaka nongkyndong kila ïoh ïa ki kor um hala ïing.
U ong ba ka Sorkar India kala ïaroh ïa ka Meghalaya halor ka jinglah ban pyntreikam ïa ki skhim bapher bapher.
Haba ban jur ba ka NPP kum ka Sorkar kala buh hakhmat eh ïa ka jingdonkam u paidbah ban trei ruh da ka mynsiem ban ïakit ïabah lem para mynsiem briew, ula ong “Kum ka Sorkar, ngi la khot ïakren ïa ki kynhun bapher bapher ban ïapynbeit ïa ki jingeh ba ki don bad ngim ju pyndonkam ïa ka bor ban weng ïa ki jingeh jingwit”.
Ula pynpaw ruh ba ki paidbah ka Jylla kila kut jingmut ban kyrshan ïa ka NPP namar ki la ïohi ba kumno ka NPP ka treikam ha ka ban weng ïa ki jingeh jong ki paidbah. “Ngim ju pyntieng ïa ki paidbah da ka suloi. Ngi ngeit ha ka nongrim ban sngap lem ïa ki jingeh jong ki paidbah” ula ong.