Shillong, Rymphang 22 : Ka Chairperson jongka All India Trinamool Congress (AITC) ka Mamata Banerjee hynne ka sngi Balang, ka la ong ba ka seng BJP bad Congress kin ym lah ban long paralok bad ki paidbah jong ka jylla Meghalaya.
Haba ai jingkren haka rynsan ïalap elekshon ha Rajabala, ka Mamata Banerjee kala ong, “Ka BJP bad Congress kiba na Delhi kin ym lah ban long ki paralok ki jong phi. Ki la don ha ka bor la bun snem hynrei kim shym la lah wat ban shna tang ïa ki surok ha Meghalaya”.
“Ka Trinamool Congress ka dei ka seng kaba trei na ka bynta ki paidbah kumta dei ban pynkylla noh ïa kane ka sorkar kaba la don haka bor ha kine ki 5 snem kiba la dep.Kane ka sorkar kam shym la leh eiei, ym don Medical College, ym don ïa ki surok kiba paka, ym shym la kyntiew ïaki jaka ai jingsumar bad kam shym la don kino kino ki kam pynroi hynrei tang ki jyrsieh bamsap” kala bynrap.
Ka Mamata kala ther ïaka seng Congress ka bym shym lah ha kaban pyndep ïala ka kamram kum ka seng kaba don ha ka Liang Pyrshah.
“Ka Congress ka pan ïa ka vote na ki paidbah hynrei shaei ka buh ïala ka hok jong ka jingïatiplem? Nga lah don haka seng Congress hynrei kila beh noh ïa nga na ka seng. Ngi ïakhun ïaka thma pyrshah ïaka BJP hynrei man la ka sngi ka BJP ka wan tied ïa ka jingkhang ka jong ngi da ki Enforcement Department bad CBI” ong ka Nongïalam ka AITC. Kala kyntu ïa ki paidbah ka jylla ba kin jied ïa u nongïalam uba napoh ka jylla hi ym da kiba nabar ka jylla.
“Kiba nabar ki kwah ban synshar hangne ban thombor ïa phi lyngba ka NRC, CAA, kuli bad ki kam jyrsieh, wat ym ailad ïa kane. ïa ka Meghalaya dei ban pynïaid hi da ka Meghalaya ym da ka Guwahati ne Delhi. Ngi ruh ngin ym pynïaid ïa kane ka jylla na Bengal. Ngi dei ki paralok ki jong phi bad ngin ïarap ïa phi ïa kaei kaei kaba phi donkam” ong ka Mamata.
Kane ka Nongïalam ka AITC ka la ong “Ka jinglong tynrai ka jong ngi, ka long ba ngi dei ki briew bad ngi ieid para briew. Ngi burom ïa baroh ki jait niam. Nga ngeit ba ka kamram kaba hakhmat eh ka jong nga kadei ban don ryngkat bad ki paidbah. Kam don kano kano ka niam kaban heh ban ïa ka niam jong ki para briew bad ban ïeng ryngkat bad ki paidbah”.
Ka Mamata kala kyntu ïa ki paidbah ba kin pynjop ïaka TMC ha Meghalaya namar kan dei kane ka seng kaban weng ïa ka seng BJP naka jingsynshar ha Delhi ha kine ki sngi ban wan, kumta ki paidbah ki dei ban jied ïaka TMC khnang ba kan lah ban pynrem ïaka BJP ha ka elekshon kaban sa long ha u 2024.
Katba u National General Secretary ka AITC u Abhishek Banerjee ula pynthikna ba lada ka TMC ka wan ha ka bor kan pyntreikam ïaka WE Card scheme hapoh shi bnai ba ka wan ha ka bor ha kaba baroh ki kynthei ha man la ki longïing kin ïoh T.1,000 shi bnai ha ka Bank Account ki jongki.
