Phah ïa u Bah Kansing ban donlang bad nga bad u CM ha Secretariat, ong u Bah Prestone ha Mawlyngot

Shillong, Rymphang 21 : U National Vice President ka NPP, Bah Prestone Tynsong ba dei ruh u Symbud Myntri Rangbah ka jylla ha ka sngi Balang u la ong ba ha Mawkynrew kito kiba jop na kiwei pat ki party kin ym ïoh jaka satia ha Secretariat namar ka NPP kan thaw hi ïa ka sorkar marwei mynta u snem.
Haba kren ïa kane ha ka jingïalang ïalap elekshon ha Mawlyngot na bynta u kyrtong ka party na Mawkynrew Bah Kansing Lyngshiang, utei u heh ka NPP u la ong ruh, “ Ha ka 02tarik ka NPP kan ïoh 33 – 34 seat bad kata la tikna bha. Phi ki nong Mawkynrew kaei kaban jia ïa u MLA jongphi lada jia ba phim jied ïa u Bah Kansing, namar uno uba jop na kiwei ki party ngan ïathuh lypa ngin pynshong ïa phi hajrong bos ieh kin ïakob hakhmat jongphi tangba ha Secretariat ngin pynshong ha tnum bad kin ymïoh ban rung wat tang ha khmat jingkhang ruh.”
Nalorkata, u ong ruh ba ki i thamula haduh katta katta ban ïohi ba mynta kijuh ki briew kiba Ïaroh ïa u Conrad bad ïa u kum u Myntri Rangbah bad Symbud Myntri Rangbah naduh u 2018, hynrei mynta pat kynsan kynsan tang shu poi elekshon ki ong ba ki dei kiba sniew bad pynmih ruh ki jingkynthoh ba harukom.
“Mynta pat ki leit sha ki constituency jong ki da kaba ong ka NPP kaba sniew kaba lehbeiñ bad kumne kumtai,” u la bynrap biang da kaba ïathuh ruh ba ha kaba sdang jong u 2018 kum ki nongïalam ki bunkam lang ban hikai ïa kitei ki nongïalam na kiwei pat ki party namar don ruh ki bym pat tip kumno wat ban soi ïa ki file ruh.
Utei u nongïalam ka party u ong ruh ba dang shen ki mih ki party kiba ong ba ki kwah ban khyllie syrtap biang ïa ka jingpynbeit pud khlem da kynmaw ba ki ruh ki don mynta lang ha ka por ba ïa rai lang ban pynbeit pud
U Bah Prestone u kynnoh ruh ba kine kiei kiei ki mih namar ha ka por ba don ka jingïalang jong ka kynhun Myntri kitei ki ïoh thiah katba shabar pat ki mih ban leit ong ha ki iew ki hat bad hylla kum ki ksew bna-lat
Ha kane ka jingïalang paidbah la ïoh ruh ïa ka jingkren na u kyrtong ka NPP, u Bah Kansing Lynshiang uba la pan ka jingkyrshan jong ki paidbah, bad ha kane ka sngi la u Bah Kansing u la pyni ruh ïa ka jingbun paid, ha kaba da ki spah tylli ki kali bad da ki hajar ngut ki paidbah ki la tuid sha katei ka jingïalang.