Leh khla palat ka BJP bad RSS, nang aibor ka TMC, ong u Rahul Gandhi

Shillong, Rymphang 22: Ryngkat ka jymphong jong u shynrang Khasi bad ki tmaiñ ba samup, u Rahul Gandhi, President barim ka Seng Congress, u la ther tyngeh ïa ka jingleh khla ka Seng BJP ryngkat ka RSS bad ka jingkyrshan pynkhlaiñ ka TMC.
Haba kren ha ka jingïalang paidbah jong ka Congress ha Madan Malki kaba ym da bun briew kumba long ha kiwei ki elekshon haba u Rahul u wan ha Shillong, u MP Ka Lok Sabha, u la ong ba ka BJP mynta ka pynïaid bad teh lakam lut ïa ki bor treikam ha ri India naduh ka Parliament, ka Election Commission, ki Lad pathai khubor bad kiwei kiwei pat ki bor treikam, khnang ban pynurlong tang ïa ki jingangnud bad jingthmu jong ka, ym ka jong kiwei.
“Nga la pynlong ka jingïaid kjat kylleng ki jaka jong ka ri India kumba saw hajar kilometer ne kata ka jingïaid kaba u ong, ka Bharat Jodo Yatra ban ïakynduh ïa ki briew ban sngewthuh ïa ki jingeh jong ki namar ka jingsynshar donbor jong ka BJP bad ka jingkynshoit ka RSS”, la ong u Rahul.
Shuh shuh u la ïathuh ha ka sien shong dorbar kaba dang shu dep, u la buh bun ki jingkylli na u Myntri Rangbah Duh halor ka jingkiew spah kynsan kynsan u paralok jong u, u Adani, uba la kiew na ka kyrdan ba 609 sha ka kyrdan ba ar ha ka jingriewspah tam ha ka pyrthei, hynrei u Modi um shym la treh jubab bad u la kylli pynban ïa u rahul balei um jait Nehru.
Kaba kham lyngngoh ka long, la ong u Rahul ba ka jingkren jong u kam shym la mih satia ha ki lad pathai khubor la la ka long ha ki kot khubor, ki Channel ne ki Social Media bad ka daw ka long ba ka sorkar BJP ka la bat lakam lut ïa baroh ki lad pathai khubor ha ri India.
“Kane ka long kaba ma shibun lada ki paidbah kim ïoh lad shuh ban pynpaw paidbah ïa ki jingeh jong ki”, la ong u Gandhi.
U la ong ba haba u wan shane, u la phong ïa ka jymphong Khasi namar ba u burom ïa ka riam bad ka kolshor Khasi, ym kum u Modi uba wan shane u riam Khasi hynrei u thombor pat ïa ka Kolshor jong ki Khasi.
Ha kane ka jingkren u Rahul u la ther ruh ïa ka Trinamool Congress da kaba ong ba baroh ki tip bha ïa ka jingtreikam ka TMC ha West Bengal kaba shu wanrah beit da ki kam jingïakulmar bad jingïaumsnam. U la ong ba ha Goa ka TMC ka la wan ban pynlut pisa ban pynjop ïa ka BJP. “Ha Meghalaya ruh ka la wan khnang ban pynkhlaiñ ïa ka BJP. Ki paidbah ki hap ban husiar”, la ong u khun jong ka Sonia Gandhi.
U la jer ruh ïa ki kam bamsap jong ka sorkar MDA, da kaba ong ba ka jingkhyllem u tnum pyllun ha ïingdorbar ba dang tei thymmai. “Nga la kylli ïa ki rangbah Congress nangne la uta u tnum u khyllem hi ne don ba pynkhyllem khnang, namar nga suba ba ki pynkhyllem khnang ban ïoh tei biang da uwei bad ban ïoh bam pisa”, la ong u Rahul.
U kdew ruh ïa ka jingbamsap ha ka khaïi dewïong tuh, ka jingdie tuh ïa u khaw reshon sha Assam bad kiwei kiwei de ki kam bamsap, kaba la pynlong duk ïa ki paidbah.