Shillong, Jymmang 01: Ka Meghalaya SSA Schools Association Central Body & Meghalaya 4th Teachers Association, ha ka sngi Thohdieng ka la pynkup burom ïa u Myntri Rangbah ka jylla u Conrad K Sangma, ha kaba ïadei bad ka jingwanrah ïa ka Structured Pay Framework (SPF) ne ka jingsiew tulop kaba thymmai ka ban ïada bad ka jingneh jong ki nonghikai SSA bad ki 4th Teachers ha Meghalaya.
Ha kane ka prokram la donlang u Symbud Myntri Rangbah ka jylla u Bah Prestone Tynsong, u Myntri ka tnat ka pule puthi u Bah Lahkmen Rymbui, u Myntri ka tnat Jngohkai u Timothy D Shira, u Myntri ka Arts & Culture u Bah Sanbor Shullai bad u MLA, Umsning, Dr C Lyngdoh, Commissioner & Secretary, Education, Vijay Mantri nalor kiwei kiwei.
Haba kren ha ka jingïalang u Myntri Rangbah u la ong ba kane kan dei ka sngi ka ban sah kynmaw ba la lah ban ïakhun ïa kiba bun ki jingeh bad ong ruh ba ki nonghikai kidei u budlum ha ka ïoh ka kot jong ka jylla.
“Nga ai khublei ia SSA bad 4th Teachers Association ba ki la pynlong ïa kane ka prokram pynkup burom wat hapdeng ki jingeh kiba bun bad ki jingaiti ïalade bad nga la ïoh ruh ka bynta ban don lang ha kane ka jingeh naduh ka snem 2016 haba nga long u dkhot Parliament bad haduh kine ki sngi nga kwah ban ïarap ïa ki nonghikai bad ka kyrdan jong ki kaba ki don bad kumjuh ruh ha ka ïoh ka kot jong ki kaba ki donkam ha kane ka por,” ong u Myntri Rangbah.
U la ong ruh ba kane ka dei ka jingeh kaba kyllaiñ bha bad na ka liang jong ka sorkar ka la shim ïa ki lad ki lynti ban pynsuk ïa baroh bad da ka jingshim ïa ka rai ban ai ka jingsiew kaba la pynwan dur.
“Nga ai khublei ïa ka Meghalaya SSA Schools Associations bad 4th Teachers Association kiba la aiti bad kiba ïaineh ha ka kam,” u la ong.
Haba ong ba kan long ka jingkmen haba ïadei bad ka SPF kaba treikam naduh ka 1 tarik u ïaïong 2026, u la ong ba kane kan dei ka sienjam kaba hakhmat ban ïarap ïa ki nonghikai ha kiba bun ki liang.
Haba pynkut u Myntri Rangbah u la ong ba ka pule puthi kadei ka mat kaba hakhmat eh jong ka sorkar bad kan ïarap katba lah ban kyntiew ïa kane ka bynta.
