Ka Meghalaya ka dei kaba lai ban siew heh dor ïa ka bai bylla sngi ïa ki bym pat don jingtbit: Conrad

Shillong, Ïaïong 01: Ïa kane ka International Workers’ Day, kaba la pynlong da ka Ophis jong u Labour Commissioner, Shillong, la rakhe ha U Soso Tham Auditorium, ha kaba la wan ban ïashimbynta da u Myntri Rangbah ka Jylla, u Conrad K Sangma, kum u Kongsan katba u Myntri ka tnad Labour, Employment and Skill Development, u Methodius kum u symbud kongsan.
Haba ai khublei ha katei ka sngi sha ki paidbah kiba kynthup ïa ki nongtrei shna jingshna, ki nongbylla bad ki nongbylla sngi, u Myntri Rangbah ka Jylla, u Conrad K Sangma, u la ong ba ïa ka International Workers’ Day la rakhe hadien ba la slem bha bad ha ka kyrdan jong ka jylla ban rakhe ïa ki nongtrei kiba long ki paia jong ka jylla. U la ong ba ka thong jong ka ioh ka kot kaba 10 Billion dollar jong ka jylla ka long kaba kynthup ia ka iohka kot bad ka roi ka par u paidbah kynthup ia ki nongtrei nongbylla kin ioh jingmyntoi.
“Ka Meghalaya ka dei ka jylla kaba ar kaba kiew stet bha hapoh ka ri kaba pynneh beit ïa ka jingkiew kaba 10% da kaba pyntreikam palat 5000 tylli ki projek kiba shongdor T.2900 klur kaba thaw 20000 tylli ki kam na ka bynta ki paidbah,” u la ong.
U la pyntip ruh ba ka jylla Meghalaya ka dei kawei na ki jylla kaba ai ïa ka dor kaba heh tam na ka bynta ki nongtrei bym don jingtbit neunskilled da kaba bynrap, “Ka Meghalaya ka ai T.525 shisngi na ka bynta ki nongtrei bym don jingtbit katba ka pynlong ïa ka kum ka jylla kaba lai ha ka ri ban ai ïa ka dor kaba heh tam na ka bynta ki nongtrei bym don jingtbit hadien ka Karnataka bad Goa.”
Shuh shuh u la bynrap ba da ka jingpyntreikam ïa ki projek kiba T. 2900 klur nalor ka jingroi ha ki jingtei, ki nongtrei ki ïoh jingmyntoi beit beit na ka ban pynthikna ba ka jingroi ha ka ïoh ka kot kan pynkylla sha ka jingthaw na ka bynta ki lad thaw kam thaw jam.
U myntri rangbah u la pyntip ruh ba ka Labour Cess ba la lum da ka jylla ka long kumba 400 klur bad u la ong, “Kane ka labour cess kaba dei ka khajna kaba 1% ba la lum na ka jinglut jingsep la pyndonkam ban pynmih pisa na ka bynta ki welfare board ban pynbiang ia ki jingmyntoi ha ka koit ka khiah, aksiden, penshon bad ka jingmyntoi ha ka pule puthi bad sha ki nongbylla sngi bad ki nongtrei ba la pynrung kyrteng ia lade.
U la pynkynmaw biang ba watla ka jingkiew ha ka ioh ka kot ka long kaba kongsan bha ia ka sorkar ban pynthikna ba yn ym don mano mano ba sahdien bad ba u paidbah un ioh jingmyntoi na kane ka jingkiew ka long kaba kongsan kumjuh.
“Mynta ka sngi nga kwah ban ai khublei ïa phi baroh kiba don hangne na ka bynta ki jingnoh synniang jong phi baroh ha kaba rah ïa ka jylla jong ngi shakhmat bad ngi don hangne mynta ka sngi ban ithuh bad sngewnguh ïa ka jingtrei shitom bad jingaiti lut jong phi”, u la ong.
Ha kane ka sngi u Myntri Rangbah u la pyllait paidbah ruh ïa ki scheme bapher sngi ba rakhe ïa ka International Workers’ Day. U Myntri Rangbah ka Jylla ula aiti ruh ïa ki Cheque bad Sanction Letter bad kiwei kiwei ki jingmyntoi sha ki nongïoh myntoi ha kane ka jingrakhe ïa ka International Workers’ Day Celebration.