Nongpoh, K’Lyngkot, 30: Ka Umphing Presbyterian Upper Primary School ha Ri-Bhoi ha ka sngi Baar ka la ioh ban plie paidbah ïa ka skul building kaba paka bad kumjuh ruh ban buh mawnongrim na ka bynta ban shna bha ïa ka madan ïalehkai bala bei tyngka da ka kompani Indradhanush Gas Grid Limited (IGGL) kum ka bai lutksan hadien ba u Pipe Gas bala pyntrei da katei ka kompani u la hap ban ïaid lyngba katei ka skul.
Ïa katei ka iing skul ba paka la wan ban plie paidbah mynta ka sngi da u Bah Mayral Born Syiem MLA ka Nongpoh kum u kongsan ha ka jingdonlang u Bah MW Kyndiah General manager (Project) IGGL, Bah HS Markhap Headmaster, Tbn. K Teron President ka Managing Committee ki nongïalam balang, ki nongïalam shnong bad kiwei kiwei ki riew rangbah.
Haba kren ha katei ka sngi na ka liang u Bah MW Kyndiah General Manager ka kompani IGGL u la ong ba katei ka kompani ka hap hapoh ka Ministry of Petroleum and Natural Gas jong ka sorkar pdeng kaba la aibor ïa katei ka kompani ban pyntrei bad pynïaid ïa ki Gas pipeline hapoh ka jylla kaba dei ruh ka jingangnud bad ka thong jong ka sorkar pdeng ban pynpoi gas lut sha baroh ki longiing shuwa u snem 2030.
U la ong ruh ba hadien ka jingïaid lynti jong u pipe gas lyngba katei ka skul, na ka liang ka kompani kum ka jingïarap kala siew da ka bai lutksan sha ki bor pynïaid skul ba kum ka skul kala ioh pat ban tei da ka ïing skul bad kiwei kiwei ki jingdonkam bad na ka liang katei ka kompani kala kular ruh ban pynbha ïa ka madan ïalehkai bala buh maw nongrim ha katei ka sngi
U Bah Mayral Born Syiem kum u kongsan u la pynpaw ka jingsngew kmen halor ki kam pynroi ba kynthup ïa ka iing skul building bad kumjuh ruh ka madan ïalehkai bala bei tyngka da ka kompani IGGL kum ka bai lutksan hadien ba u pipe Gas jong katei ka kompani u ïaid lyngba katei ka skul, watla kila don shibun ki jingpyrshah ha ki snem bala leit halor ka jingpyntrei katei ka kompani ban pynïaid ïa u pipe gas ha ka jylla.
