Nongpoh, K’Lyngkot 30: Da ka jingangnud ban pynsuk ïa ki paidbah jong ka dong Ri-Bhoi ban ioh ïa ki kali Tata, ka Frank Motors kaba dei ka kompani kaba pynïaid ïa ki kali Tata ha ka jylla kala pynïar shuh shuh ïa ka tnad treikam jong ka sa ha Nongpoh Ri-Bhoi District ba ki paidbah kim donkam shuh ban leit shaduh Shillong lane Guwahati ban ioh ïa ki kali Tata.
Ïa katei ka tnad thymmai jong ka Frank Motors (Showroom) kaba don Nongpoh la wan ban plie paidbah mynta ka sngi da u Bah Ivan Kharmon District Transport Officer ka Ri-Bhoi District, Bah Silvester Mynsong Rangbah Shnong Nongpoh, Bah Rayonald Kharkamni Secretary Nongpoh Town Committee, Bah Indonlang Passah trai jong ka Frank Motors bad kiwei kiwei ki riew rangbah na ka thaiñ Nongpoh.
Haba kren ha katei ka sngi na ka liang u Bah Indonlang Passah trai ka Frank Motors u la ong ba ka jingthmu jong u ban pynïar ïa ka tnad treikam sa sha Nongpoh ka long ban nang pynsuk shuh shuh ïa ki paidbah ban ioh ïa ki kali tata namar kumba long mynta ki paidbah kiba kwah ïa ki kali Tata ki hap ban leit shaduh Shillong lane Guwahati.
U la ong ruh ba ki kali Tata kim dei shuh kiba dang thymmai ïa ki paidbah hynrei kila dei kiwei na ki jait kaki ba paw ha ka ri namar la shna ïa ki katkum ka jingïaid jong ka juk ba mynta bad ka jingplie ïa katei ka dukan thymmai ha Nongpoh kam dei tangba pynsuk ïa ki paidbah hynrei kan long ruh ka jingkyrkhu ïa ki khun samla ha ka lad iohkam iohjam.
