Nongpoh, Naiwieng 13 : Ki pulit jong ka Special Task Force ka Assam ki la ïoh ban kem noh ïa arngut ki briew ki ba donkti ban shna pisa thok. Ïa kine ki arngut la kem nyngkong ïa u wei na Assam hapoh ka jing ïalam jong u Inspector Kapil Pathak bad ka kynhunjong u ki la ïoh ban kem noh ïa arngut ki briew ki ba donkti ha ryngkat ki pisa thok.
Haba ki pulit ka STF ki la sdang ban kdong ïa u wei na kine ki ba donkti, ki la pyn-ap shrip ban ïoh kem hynrei u la ïoh ban phet da ka kali Astar kaba don ïa u Number AS 02 F 8100 bad hadien ka jingkthong ki pulit ki la ïoh ban kem noh ïa ka Kali bad ïa u nongñiah ha Kainadhara Assam.
Ïa une uba shah kem la tip kyrteng kum u Harsh Wahlang 20 snem ka rta na ka shnong 9 mile Baridua Ribhoi District, khun jong u Bikas Tamang ha ryngkat u paralok jong u, u Sahil Ali, khun jong u Sonaudin Ali na Assam. Na kine la ïathuh ba la ïoh ban kurup ïa ka pisa kaba kot sha ka 3,70,000 ha ka lut 500 bad kawei ka mobile phone.
Hadien ka jingtohkit ka jong ki pulit, la ïathuh ba ïa kine ki arngut kiba la phla bad ïalam syndon sha ka jaka treikam jong ki ha ka wei ka ïing wai kaba don ha ka shnong 9 mile Baridua Ri Bhoi District kaba hap hapoh ka Khanapara Police Station bad la ïoh ban kurup syndon ïa ka kor shna pisa ryngkat ki kot shna pisa thok bad ka pisa haba kyllum lang bad kaba ïoh bat ryngkat ki briew ka la kot sha ka 6,87,500 tyngka.
Ïakine ar ngut la rah noh da ki pulit la Assam ban pynlong ïa ka jing tohkit bad ban lap shuh ïa ki ba don kti ha kane ka kam khaii tuh ïa ki pisa thok.
