Mynta yn sdang ka SPL 2026: Khreh ka Sawmer ban aireng pyrshah ïa ka Langsning kaba bat ïa ka nam lahduh

Shillong, Naitung 24: Ka jingapkhmihlynti ban sakhi biang ïa ki kynhun ba kynsai jong ka nongbah ha ka rynsan ïakhun jong ka Shillong Premier League 2026 kan sa urlong ha kane ka sngi Saitjaiñ ha kaba ka Langsning, kaba bat ïa ka nam lahduh kan ïakhun pyrshah ïa ka Sawmer ha ka jingïalehkai ba nyngkong ha madan First Ground SSA Stadium, Polo. Kane ka jingïalehkai kan sdang ha ka por 4:45 baje janmiet.
Ka Langsning ka la pyndep ha ka kyrdan ba ar ha ka sienjam kaba 5 jong ka Meghalaya State League ha u Jylliew, bad nalor ba kan khmihlynti ban ïada ïa ka nam lahduh jong ka ha ka SPL, kan pynkhreh ruh ban ïashim bynta ha ka sien ba nyngkong ha ka Durand Cup ha kaba sdang jong une u bnai.
Ha kaba sdang jong une u bnai, ka Langsning ka la pynbna ïa ka thup jong ki nongïalehkai ba thymmai na ka bynta kane ka samoi, ha kaba ka la pynrung 10 ngut ki kyrteng ba thymmai ha ka thup jong ki.
U Samuel L Kynshi, uba la ïalehkai na ka bynta ka India ha ka Asian Games, un ïalam ïa ka kynhun ryngkat bad u rangïalehkai pdeng barim ka Shillong Lajong FC, Mawlai SC, Punjab FC bad Real Kashmir FC kiban ïasoh bad kane ka kynhun kaba bat ïa ka nam lahduh jong ka SPL. U Samuel dang shen eh u la ïalehkai na ka Gokulam Kerala ha ka Indian Football League, watla um shym la ïoh ban mih madan than ha ka samoi ba la dep.
Kiba wan ïasoh na ka FC Bengaluru United ki long arngut ki rangïalehkai – u Allen Lyngdoh Nongbri u rangïalehkai dien liang kadiang (left-back) bad u rangïalehkai ba shakhmat u Syed Ahmed. Ki la don ryngkat bad ka FCBU kaba la pyndep ha ka kyrdan ba ar ha ka I-League 2, kaba la pynlong ïa ka kynhun ban kiew kyrdan sha ka IFL 2026-27.
Ki don sa arngut ki nongïalehkai kiba la wan ïasoh na ka Garhwal FC – u rangïalehkai pdeng u Richie Kharbani (uba la don bad ka Langsning mynshwa) bad u rangïalehkai ba shakhmat u Rohan Manar. U rangïalehkai pdeng u Alex Manar uba la mih madan mynta u snem ïa ka kynhun U-20 ka Meghalaya ha ka National Football Championship, ruh u la wan ban pynïasoh ïalade bad kane ka klob.
Saw ngut kiwei pat kiba ka Langsning ka la soi ki long u rangïalehkai ba shakhmat u Monush Lapang (uba wan ïasoh na ka Rymbai Shkenshynriah), arngut ki rangïalehkai pdeng u Mebanshngain Kurkalang (Rangdajied United), u Wadajied Kynsai Ryngkhlem (Shillong Lajong), bad u rangap-dien u Rituraj Boruah (Chhaygaon).
Ha kawei pat ka liang jong ka kynhun ban ïakhun mynta ka sngi kan long ka Sawmer. Ki la mad ïa ka samoi kaba sniew bha ha u snem ba la dep, da kaba jop saw sien bad shah rem san sien kaba la pynlong ïa ki ban pyndep ha ka kyrdan kaba hynriew.
Ka Langsning ka la jop lut ïa ki lai tylli ki jingïakhun ba khatduh jong ka SPL pyrshah ïa ka Sawmer hynrei kane ka Sawmer kaba mynta kan kham pher da ka jingpynkhlaiñ jong ka ïa ka kynhun.
Ki katto katne ki kyrteng ba thymmai ha ka kynhun ki kynthup ïa u Oresterwell Langshiang, uba dei uwei na ki katto katne ngut ki rangïalehkai ba la soi na ka Nongrim Hills (kiba la shah pynhiar kyrdan ha kaba kut jong u snem 2025), u Raikutshisha Buam bad u Banteilang Lyngdoh na Nangkiew Irat bad u Cannyson Kharnaior na Malki.
Katba kane ka lympung ïalehkai ka long beit ha ka rukom ïakhun kaba shi lynti ne single leg, da kumta man la ki jingïakhun ïa ki kynhun ka long beit kum ka phainal. Ka Langsning ka la mad ïa ka jingsdang kaba suki ha ka SPL 2025 hynrei ka la wanphai biang ban jop ïa ka lympung. Ka la long kumjuh ïa ka Sawmer, ka la mad ïa ka jingshah rem ha ki jingïalehkai ba sdang shuwa ban sdang ka jingkylla kaba la pynlong ïa ki ban pyndep ha ka thup kyrdan ba pdeng jong ka miej.
Ka SPL ka la long ka lympung kaba kongsan ban kyntiew ïa ka phutbol – ym tang ha nongbah Shillong hynrei ha baroh kawei ka jylla Meghalaya. Namar ba ka SPL ka don jingktah ban rai ïa kino ki kynhun ban rung sha ka SSA Super Cup, SSA Champions Cup bad ka MSL, kawei pa kawei ka klob kan ïaleh katba lah ban pyndep ha ka kyrdan ba hakhmat.