Shillong, Jylliew 04: Ka madan ka la long kaba la pynkhreh bad baroh ar ki kynhun ki la khreh ban jam sha ka jingïakhun phainal jong ka 5th Meghalaya State League, ka ban long ka jingïakhun kaba shyrkhei hapdeng ka Nongkseh SSCC pyrshah ïa ka Langsning FC. Kane ka jingïalehkai kan long ha madan First Ground SSA Stadium, ha ka por 6 baje janmiet ha kane ka sngi Thohdieng. Ïa kane ka jingïakhun yn pyni live ruh lyngba ka app Hello Meghalaya.
Lah ban kdew ba ka la long ka dustur ha ka MSL ba ha ki saw tylli ki sienjam ba la dep ym shym la don kano kano ka klob kaba la jop palat ïa ka shi sien ïa ka nam lahduh bad ka sienjam kaba 5 jong kane ka lympung kan ym ïapher namar ba ka Nongkseh bad ka Langsning kim pat ju poi sha ka final jong ka MSL.
ïa ka MSL la sdang bad pynlong da ka Meghalaya Football Association bad ka Directorate of Sports & Youth Affairs ha u snem 2017. Kawei na ki daw ba kongsan ka long ban lap ïa ki sap bad kane ka lympung ka la lah shisha ban pyndep ïa kane ka thong.
Ki don 33 tylli ki kynhun na kylleng ka jylla kiba la ïashim bynta mynta u snem bad ki ar tylli ki kynhun ba dangsah kin ïakhun ban ïoh long ka lahduh jong ka phutbol ha Meghalaya.
Ïa ki khusnam na ka bynta ka lahduh bad ba wan ba ar la pyllait hynne ka sngi ha ka jingïadon lang ki kapten bad ki coach jong ka Nongkseh bad Langsning ryngkat bad ki nongkitkam ba rangbah jong ka MFA ba la ïalam da u President bah Hamletson Dohling.
Haba ïakren bad ki nongthoh khubor, u coach ka Nongkseh u Richard Nongneng u la ong, “Ngi la pynkhreh bha, bad watla ngi burom ïa ka liang pyrshah jong ngi, hynrei ngi shaniah skhem ba ki nongïalehkai jong ngi kin lehkai bha bad rah ïa ka trophy.”
Kane ka dei ka samoi kaba nyngkong jong ka Nongkseh ha ka MSL hynrei ka don katto katne ngut ki rangïalehkai kiba la ïalehkai ha kane ka kyrdan ne kham shalor mynshwa. Uwei na kiba kum kita u dei u kapten, u Hardy Cliff Nongbri. “Baroh ki nongïalehkai ki long kiba bit bad ngin trei shitom bad pyntreikam ïa kaei kaba ngi la pynkhreh hapoh u coach jong ngi”, u la ong.
Ka Nongkseh kam pat shym la shah rem ha ka MSL 5 bad ha ka jingshisha kane ka jingïalehkai kaba seisoh ka la sdang naduh u snem 2025 ha kaba kam shym la shah rem ha ki jingïalehkai ki lympung ha ka thaiñ.
Dei ha u bnai Nohprah ba ki la ïakynduh pyrshah ïa ka Langsning ha ka Semifinal jong ka SSA Champions Cup bad katei ka jingïalehkai ka la sdang da kaba ka Langsning ka la lamkhmat ïa ka jingïalehkai da kaba thep ar tylli ki kol shuwa ba ka Nongkseh kan pynïakhaid bad nangta ka la jop ha ka tiebreaker.
Na ka liang u coach ka Langsning, u bah Khlain Pyrkhat Syiemlieh, u la pynpaw “Ka Nongkseh ka dei ka kynhun kaba khlaiñ bha hynrei ka don katto katne ki jingduna bad ngin sa lehkai bha katkum kata”. “Ngi long kiba la pynkhreh ha ka jingmut jingpyrkhat bad ha ka bor met.”
Ka Langsning ka la poi sha ka semis jong ka MSL ba nyngkong eh ha u snem 2017 kaba dei ka jingïalehkai kaba bha tam na ka bynta jong ki haduh mynta u snem. Na ka liang u kapten ka kynhun, u Atlanson Kharmaw, uba la ong, “Ngin ïalehkai da kaba tyngeh naduh kaba sdang. Ngi long kiba la pynkhreh bad sngewskhem ban jop”.
Ka jaka die tiket jong ka SSA kan plie ha ka por 1 baje mynsngi na ka bynta baroh ki nongkyrshan kiba thrang ban sakhi ïa kane ka jingïakhun.
