Shillong, Nailur, 29: Ka jingïakren pynbeit pud na ka bynta ka Wat kaba ar hapdeng ka Sorkar Meghalaya bad ka Sorkar Assam ha ka kyrdan Myntri Rangbah kan long lashai ka sngi Saitjaiñ ha State Guest House, Khanapara, Guwahati, Assam ha ka por 1:00 baje nohphai sngi.
Ka Sorkar Meghalaya bad ka Sorkar Assam ki la thung ïa ki Regional Committee ki ban sor jamin ïa ki hynriew tylli ki jaka kiba dang don hapdeng ka jingïakajia pud ha ka jingïapynbeit pud ha ka wat kaba ar.
Ha ka wat kaba nyngkong, ka Sorkar Meghalaya bad ka Sorkar Assam ki ladep ïapynbeit ïa ki hynriew tylli ki jaka kiba don hapdeng ka jingïakajia pud, kiba kynthup ïa ka Hahim, Gizang, Tarabari, Boklapara, Khanapara-Pilingkata bad ka Ratacherra.
U Myntri Rangbah jong ka jylla Assam u Himanta Biswa Sarma bad u Myntri Rangbah jong ka Jylla Meghalaya u Conrad Kongkal Sangma ha ka 29 tarik, Lber, 2022, ki la ïasoi ïa ka dulir ïasngewthuh jingmut hakhmat u Myntri ka tnat Kam Pohïing ka Ri u Amit Shah ha New Delhi, ban pynkut noh ïa ka jingïakajia pud kaba la neh jin haduh 50 snem kynthih hapdeng kine ki ar tylli ki jylla.
Sa hynriew tylli ki jaka kiba dang don hapdeng ka jingïapynbeit ïa ka jingïakajia pud ha ka wat kaba ar ki kynthup ïa ka Langpih, Borduar, Nongwah-Mawtamur, Desh Doomreah, Block 1 & Block II bad ka Psiar-Khanduli.
Dang shen u Himanta Biswa Sarma uba la wan ïuhkjat ha nongbah Shillong u la ïakynduh kyrpang ïa u Conrad Sangma tang hapoh shikynta ban ïakren khyndiat na ka bynta ban buh ia ka sngi ïakynduh halor kane ka jingthmu.
