Sha ka ïingbishar pyntip ka Sorkar ba la mynjur ïa ka jingpan pynheh jaka ki Harijan

Shillong, Nailur 29 : Ka Sorkar Jylla ka la pyntip sha ka ïing bishar High Court jongka jylla ba ka la mynjur ïa ka jingkyrpad ka Harijan Panchaya Committee(HPC) ban kham pynheh ïa ka jaka (plot) ba kin shna ïing kumba la kwah da ki Nongshong shnong ka Them Metor khnang ban pynkynriah noh ïa ki na Them Metor.
ïa kane la pyntip hapoh ka Iing Bishar High Court ka jylla da ka sorkar kaba shong bishar ïa ka mukotduma ba la mudui da ka Sorkar Jylla bad ka Harijan Panchayat Committee (HPC) hynne ka sngi Thohdieng.
Ha ka hukum, ka ïing bishar ba kynthup ïa u Chief Justice Sanjib Banerjee bad Justice B Bhattacharjee ki la pynpaw ïa ka jingsngewkhia ba ‘Wat hapdeng ka jingai por kaba biang ban ïakren pynbeit ïa kane ka kam, hynrei kam pat shym don don satia ka jingïabeit”.
Ka ong ba ka Sorkar ka la aiti ïa ki thup jingkyrpad jong ki longïing ka Them Metor bad ka Sorkar ka la nang pynheh ïa ka jaka ban ai ha ka ban shna ïing.
Ka la ong ruh ba ka Sorkar ka la pyntip ba kam shym la don satia ka jubab na ki longïing ka Them Metor katba kine ki longïing ki la kam ba ka jingtyrwa jong ka Sorkar ban nang pynheh ïa ka jaka kam pat poi satia sha ki.
Ka ïing bishar ka pyntip ruh ba kine ki longïing ki la leit ïakren ïa kane ka kam bad ka Sorkar Pdeng ha kaba ka Sorkar Pdeng ruh ka la khmih ïa kane ka jingkyrpad da ka jingïasngewlem.
Ka ïing bishar ka la buh ban bishar biang ïa kane ka kam ha ka 3 tarik u Risaw.