Mynta ka sngi yn plie pyrda ïa ka Subroto Cup Sub-Jr (U 14) ha Bengaluru

Bengaluru, Nailur 30 : Ka lympung kynjatbol kaba la tip da ka 62nd Subroto Cup International Football Tournament jong ka kyrdan Sub-Junior (U 14) shynrang (Boys category) kan sa sdang naduh mynta ka sngi, ka i tarik u Risaw ha Bengaluru
Kane ka dei ka sien kaba nyngkong ha ka pateng jong kane ka lympung, ba ïa ka national championship kaba dei ka lympung hapdeng ki skul napoh ki jylla yn pynïalehkhun shabar jong ka nongbah ka ri India. La slem ba ka Subroto Mukherjee Sports Education Society (SMSES) ka la kwah ban rah pynlong ïa kane ka lympung sha ki jaka ba kham kyndong jong ka ri bad kane ka Sub-Junior kan dei ka sien kaba nyngkong ha ka jingpyrshang ban kyntiew ïa kane ka lympung shabar jong ka nongbah.
atkum ka prokram kaba la pynbeit, ïa ki jingïakhun ha ka group stage yn pynïalehkai ha Air Force School, Jalahalli, Air Force School, Yelahanka bad ha Air Force Training Command. Katba baroh ki jingïalehkai ha ka knockout la pynkhreh ban pynïakhun ha Army Service Corps (ASC) Centre. Ha ki jingïakhun hapoh ka Group Stage kin don haduh 37 tylli ki kynhun, kiba kynthup ïa ki kynhun napoh Bangladesh kiba shimbynta na ka bynta ka burom jong kane ka lympung. La ïoh ban phiah ïa kine ki kynhun haduh 8 Group, ha kaba ka kynhun kaba bat kyrdan ba nyngkong ha man ki Group kan ïoh rung sha ka quarterfinals.
Ka jingïalehkai kaba nyngkong ha kane ka kyrdan kan long na ka thup jong ka Group A , ha kaba ka HK Singh Memorial Secondary School, West Jaintia Hills, Jowai, Meghalaya kan aireng pyrshah ïa ka Sainik School, Tilaiya, Koderma, Jharkhand, kaba mihkhmat ïa ka Sainik Schools ka ban sa ïakhun ha Air Force School, Jalahalli 7 AM (IST). Hadien kane yn bud sa ka jingïalehkai na ka Group B hapdeng ka Chawngfianga Middle School, Saiden, Kulasib, Mizoram bad ka Ramkrishna Mission Vivekanand Vidyapeeth, Narayanpur, Chattisgarh a ha ka por 8:30 mynstep
Ha kawei pat ka jingïalehkai na ka Group B kaba la pynkhreh ha ka por 10 baje mynstep, kan long hapdeng ka Primary Marathi School, Kauncha, Chikhalipada, Silvassa, DD & D&NH ka ban aireng pyrshah ïa ka Manikpara High School, Jhargram, West Bengal. Ka jingïalehkai kaba khadduh ha kane ka sngi, kan long hapdeng ka SS +2 Higher School, Simdega, Jharkhand ka ban ïakhun pyrshah ïa ka Air Force School, New Delhi ha ka por 3 baje nohphaisngi.
Ki jingïalehkai Group Stage kan bteng haduh ka 6 tarik u Risaw bad ki kynhun ba la ïohrung sha ka quarterfinal kin sdang ïa ka jingïalehkai ha ka 7 tarik u Risaw. ïa ka semi-final la pynbeit ban pynïakhun ha ka 8 tarik katba ïa ka final ha ka 10 tarik u Risaw, 2023.
Kumban shu pynkynmaw, ka skul Heirok Higher Secondary School, Imphal, Manipur ka dei ka kynhun ka ban ïada ïa ka burom ha ka kyrdan Sub-Junior (U 14) Boys mynta u snem.