Nongpoh, Lber 13: Ha kawei ka jingjia aksiden 2 ngut ki briew kila mynsaw ba kynthup ïaka MDC jong ka party Voice of the People’s Party na Laitumkhrah Constituency bad uwei pat, hadien ba ka kali ba ki shong kala hap sha nala harud surok bah National Highway 6 haka shnong Quinine, Ri-Bhoi District.
Katkum ka jingtip bala ioh lum naki pulit ka Ri-Bhoi, la ong ba kane ka jingjia kala jia haka 8 tarik mynta sngi Saitjaiñ haka por 11 baje eiei mynmiet ha kaba kawei ka kali kaba ki shong kaba dei ka kali Hyundai i10 kaba don ïa u number ML 05 S 1130 bala ñiah da u Aldoly Mawthoh na Malki Pdeng shnong ka dang kiew sha nongbah Shillong hynrei ynda poi ha ka shnong Quinine katei ka kali jong ki kala hap sha nala.
Ha katei ka jingjia 2 ngut ki briew kila mynsaw ba kynthup ïaka kong Deity Majaw kaba dei ka MDC Laitumkhrah, bad u Bah Geoffrey Pohlong na Malki Pdeng Shnong bad la pynkit noh ïaki mar mar da ka ambulance sha Bethany Hospital Nongpoh ban ioh ka jingsumar, hynrei namar ka shitom bala kham jur la pynkynriah noh sha Hospital ha Guwahati.
Naka liang ki pulit ka Nongpoh Traffic Police kila leit mar mar sha katei ka jaka ban tan ïa katei ka kali kaba don ruh da ki tin beer ba thylli, bad ïa katei ka kali la wanrah sha Nongpoh PS bad ka jingtohkit halor katei ka jingjia ka dang ïaid shakhmat.
