Mynsaw jur u samla ba leit tynrah ïaka trok ha Umrangksai, bun ki jingjia aksiden ha Ri-Bhoi

Nongpoh, K’Lyngkot 11: U wei u samla ba dang 32 snem ka rta bala tip kyrteng kum u Jeferson Phawa na East Jaintia Hills District, u la mynsaw jur haka jingjia aksiden hynnin ka miet ha kaba kawei ka scooty kaba u ñiah kaba don ïa u number AS 01 DD 2780 u la leit ban tynrah ïaka tiar jong kawei ka trok kaba dang ïaid ha surok bah National Highway-6.
Katei ka jingjia kala jia haka por kumba 6 baje eiei ha kaba utei u samla u dang mih na USTM ban kiew sha Shillong hynrei ynda poi haka shnong Umrangksai ha Ri-Bhoi u la leit ban tynrah ïa kawei ka trok kaba dang ïaid kaba don ïa u number ML 11 A 1410 bala ñiah da u Rangkynsai Nongphlang naka shnong Umshor shor Ri-Bhoi District haduh ba ka scooty jong u kala sied sha nala jong ka surok.
Ha katei ka jingjia utei u samla u la mynsaw jur bad la pynkit mar mar sha Nongpoh Civil Hospital naka bynta ka jingsumar bad namar ka jingshitom kaba la kham jur haka bynta jong ka khlieh ïa utei u samla la pynkit noh sha nongbah Shillong ban ioh ka jingsumar ba kham bha.
Shuh shuh katkum ka khubor naki pulit la ong ba kila don shibun ki jingjia aksiden ha Ri-Bhoi District naduh ba sdang u snem thymmai ha kaba ki pulit kila kyrpad ïaki paidbah ban long kiba peitngor bad bud ryntih ïaki kyndon ñiah kali ban lait naki jingjia ba sngewsih.