Mynjur ka Kynhun Myntri jong ka Sorkar Pdeng ïa ka National Sports Policy 2025

New Delhi, Naitung 01 : Ka Kynhun Myntri jong ka Sorkar Pdeng hapoh ka jingïalam jong u Myntri Rangbahduh ka Ri, Narendra Modi ha ka sngi Ba-ar ka la mynjur ïa ka National Sports Policy (NSP) 2025 da ka thong ban pynkylla dur bad kyntiew stet ïa ki kam ïalehkai ha ka Ri baroh kawei.

Kane ka Policy ba thymmai kan aibor bad pynkupbor ïa ki nongshong shnong ka Ri ba kin kiew arted ha ki kam ïalehkai.

Hadien ba ka kynhun Myntri ka la dep ban mynjur ïa ka National Sports Policy, na ka liang u Myntri ka tnad Youth Affairs ka Sorkar Pdeng u Mansukh Mandviya u la thoh ha ka rynsan social media, ‘Kane ka Policy kan long ka lynti kaban maitphang ban kyntiew ïa ki kam ïalehkai ha ka Ri naduh tynrai, kan pynbiang ïa ki jaka ïalehkai, kan kyrshan ïa ki nongialehkai bad kan pynlong ïa ka India kum ka ri kaba radbah ha ki kam ïalehkai.”

Ia kane ka Policy ba thymmai kaban bujli noh ïa ka National Sports Policy jong u 2001 kaba rim, ka don ïa ka thong ba kan wanrah ka jingkylla kaba stet na ka bynta ban poi sha ka thong kum kawei na ki ri kaba don hakhmat eh ha ki kam ïalehkai. Ka thong jong ka polisi ka long ruh ban pynlong ïa ka India kum kawei na ki ri kaba khlain bor ha ki kam ialehkai ha ka pyrthei kynthup naduh ka Olympic Games kaban long ha u snem 2026.

Ïa ka NSP – 2025 la pynwandur bad pynjanai da ka jingiatai bad ka jingai jingmut lang da ki tnad bapher bapher ka sorkar pdeng kynthup; naduh ka NITI Aayog, ki sorkar jylla, ki National Sports Federation, ki nongïalehkai, ki riewshemphang bad ki riew paidbah.

Kane ka Policy ka don san tylli ki païa ba kan teikam, kata ban paw ha ki lympung heh ha ka pyrthei. Kumta, kine harum kidei ki katto katne ki mat kiba la sot na kane ka policy.

Da kane ka thong ka sorkar pdeng ka buh ban don ïa ki jaka ai jinghikai naduh tynrai kynthup naduh ka jingwad ïa ki riew donsap ha ka rta kaba dang rit. Nangta ban don ruh ia ki lympung ïakob ïalehkai bad ki jaka ïalehkai kiba biang  ha ki nongkyndong bad kumjuh ruh ha sor.

Ka thong ka long ruh ban don ïa jaka ai jinghikai kiba paka tam ha ka pyrthei, ki coach kiba biang, bad ki jingdonkam kiba pura ban kyrshan ïa ki nongïalehkai.

Ban pynkhlain, kyrshan bad kyntiew ïa ki synjuk ïalehkai ha ka ri ne kita ki National Sports Federation.

Kawei pat ka bynta ka long ban ithuh ruh ïa ki kam ïalehkai kum kawei ka lad ban kyntiew ïa ki kam jngohkai pyrthei, kata ban khring ïa ki nongwan kai da kaba pynlong ïa ki lympung ïalehkai kiba heh ha ka pyrthei.

Kawei pat ka long ban plie lad ba ki kam ïalehkai kin kyntiew ruh ïa ka imlang sahlang ha ki shnong ki thaw da kaba ailad ïa ki longkmie ba kin shim bynta lang lyngba ki skim bapher bapher khamtam na bynta kiba duk, ki riewlum bad kiba don jingthut ha ki dkhot met.

Kawei ruh ka long ban kyntiew bad pynkhie im biang ïa ki jingïalehkai tynrai ne ki jingïalehkai jong ki mynbarim.

Katei ka policy ka don ruh ïa ka thong ban pynlong ïa ka kam ïalehkai kum kaewi na ki lad ïohkam ïohjam.

Ka don ruh ïa ka thong ban pynïasoh ïa ki nong India kiba sah ha kiwei pat ki bynta jong ka pyrthei lyngba ki kam ïalehkai.

Ka Policy ka kdew ruh ïa ka jingdonkam ban don ka jingshim bynta lang salonsar ha baroh kawei ka ri. Ka don ïa ka thong ban don ïa ki jaka ïalehkai na bynta baroh.

Bad kaba kham kongsan ka long na ka bynta ban pynïasoh lang ïa ka pule puthi bad ki kam ïalehkai, kata ka Sports Policy ba kan ïaid ryngkat ryngkat bad ka National Education Policy.

Katkum katei ka policy, ka sports kadei ban long ka bynta kaba kongsan tam ha ka lynnong ha ka pule puthi.

La kdew ruh ba dei ban don ka jinghikai kaba kyrpang ïa ki nonghkai  kot bad khamtam eh bad ïadei bad ki kam ïalehkai ne physical education, ba kin hikai shaphang ki kam ïalehkai hapdeng ki khynnah skul bad ai ruh ïa ki ïa ka jinghikai kaba donkam.

Nalor kine, ki la don ruh sa bun tylli ki mat ha kane ka Policy kiba ka sorkar pdeng ka buh thong ba da kaba pyndonkam hok ïa ka, ka India ha kawei ka sngi kan sa lah ban paw bad khur bun tylli ki takma ha ki lympung ïalehkai ba paw jong ka pyrthei.