H adien ka thma ktien kaba shyrkhei bha ryngkat ka rah sdie ba i shyrkhei da kawei ka longkmie na ka daw ba ki bor jongka Municipal ha ryngkat ki Majistor, ki heh pulit bad ki bor pulit ki la leit sha Khyndai Lad ban pynkynriah noh ïa kito kiba shong madan khamtam ïa kito ki bym pat rejister bad ka Municipal, mynta ka sngi la ïohi ba ka la wan phai ka jingjai jai bad da ka jingïakren sngewthuh hapdeng ki nongshong madan bad ki bor pynïaid ka Municipal ba la synran da ki bor pulit, la ïohi ba ki la ïapoi sha ka jingsngewthuh ba kito kiba ym pat don ka Certificate of Vending (COV) ki la kloi ban pdiang ba kin lum noh ïa ki tiar ki tar jongki ban lait ka jingshah knieh ha ki bor ka Municipal.
Ka jingpdiang jongki ka long halor ka nongrim ba ynda ki la ïoh ïa ka COV kin sa wan phai biang sha ka jaka ba la buh ïa ki ban shong. Kumba long kat haduh ynta na ki 457 ngut ki nongdie madan ha Khyndai Lad, kiba la ïoh jingithuh ki don 407 ngut bad kane ka long kat kum ka survey ne jingjurip ba la leh da ka Provisional Town Vending Committee (PTVC). Kat haduh mynta naduh ba la sdang ban sam ïa ki COV kata naduh ka 2 tarik Jylliew mynta u snem la dep ban sam sha ki 251 ngut ki nongshong madan.
Na ka liang ka PTVC ka la pyntip biang sha kito ki nongshong madan ki bym pat don ki COV ba kin mih noh shwa na ka jaka ba ki ju shong baroh shi katta hapoh ki lai sngi bad na ka bynta kito kiba la don ka COV ka jingai jaka ïa ki kan sdang noh naduh ka 22 tarik mynta u bnai.
Related Posts
Ha ka jingshisha shwa ba ka Municipal bad ki bor synshar district kin kyndang ïa ki nongshong madan na Khyndai Lad ha ka 30 tarik Jylliew 2025, la dep ai jingtip lypa sha ki bad la dep ruh ban pynbna paidbah wat da ki tynghung ruh ba ka jingpynkynriah ïa kito ki bym don ki COV kan sdang ha ka 30 tarik u Jylliew 2025. Namar ka kam ka long kaba eh haduh katta katta ban pynsngewthuh ïa ki nongshong madan, la ïatrei lang da ka ophis jongka Municipal, ka Ophis jongka DC bad ka tnad Pulit ban leh ïa ka kam. ïa kito baroh kiba la don ka COV yn sa pynkynriah ïa ki da kaba jai jai sha ka jaka ba la shna bha ba kin shong dukan kata ha MUDA Parking Lot bad kumjuh ruh ha pyrshah ka State Bank of India.
Ym tang ba ka sorkar kan pynkynriah ïa ki hynrei ka la pynkhreh ruh bad ka skhim ban ai mar 20 hajar sha man la uwei pa kawei na ki nongshong madan kata 10 hajar ha ka sien ba nyngkong bad nangta pat 2 hajar shibnai haduh san bnai lynter. Ym tang kata ka PTVC ka jurip ruh kylleng ki jaka ba don ki nongshong madan ha ki jaka ba hap hapoh ka Municipal khnang ban ïoh pyntreikam ïa kane ka skhim bad ruh ban buh ïa ki ha ki jaka ba kyrpang ban lait na ka jingkhapngiah ki surok bad ki lynti ïaid kjat jong ki paidbah. Ha ka jingjurip bad lum jingkheiñ ha baroh ki jaka ba hap hapoh ka Municipal lah ap ba ki don 1400 ngut ki nongshong madan bad kiba la ïoh jingithuh ki don 760 ngut.
Ka jingpyntreikam ka la sdang shwa kum ka bynta ba nyngkong eh na Khyndai Lad bad hadien kata kan sa treikam sa sha kiwei kiwei ki jaka. Ka jingthmu jongka sorkar kam dei ban knieh ïa ka pliang ja jong ki nongshong die madan hynrei ka daw ka long ban buh ïa ki ha ki jaka ba kyrpang ba ki ruh kin suk bad ban lait khapngiah ka sor Shillong bad lait ruh na ki jingma jingmynsaw. Namar kumba long mynta ka surok ka la dei ka lynti ïaid jong ki briew namar ka lynti ïaid ka la dei ka jaka die madan. Kumta kaba kongsan ka long donkam ban ïatrei lang bad kane ka jingpyrshang jongka sorkar namar nalor ba ka ai ïa ki jaka ba kyrpang ba kin neh junom, ka dang ai ruh sa ka pisa ba kin dang ïoh ban pynheh ïa ka kamai kajih jongki. Kam myntoi ban ïaleh pyrshah hynrei kaba bha tam ka dei ka jingïatrei lang.