Jowai, Naitung 01: Ka seng PSM, JNC bad ki Nongri syiar, hadien ba ki la ïoh ïa ka jingujor ba ki don ki briew kiba shalan beaiñ ïa ki syiar kiba wan kit na ka jylla Assam khlem da pynbiang ïa ki kot ki sla kum ki Challan bad ki medical Certificate ba issue na ka tnad Veterinary jong ka sorkar. Ha ka sngi Nyngkong ki la ïoh bat syndon ïa artylli ki kali Mahindra Pick-Up ba don ïa u registration Number AS02 E C0250 bad AS02 E C1715.
Hadien ba la bat ïa kitei ki kali, ha ka jingtohkit la lap ba kine ki kali kiba kit ïa ki syiar na ka jylla Assam, ki khlem da don ïa ki kot ki sla kiba biang bad ruh ki khlem ïoh ïa ki Medical Certificate na ki tnad sorkar ban pynshisha ba ki syiar kin lait na ki jingma bad kiba long ban die bad ban bam doh.
Na ka liang ka PSM, JNC bad ki Nongri syiar ki la ïathuh ba ha ka por ba tohkit bniah ïa ki nongñiah, hynrei ki don pynban ki briew kiba wan phone ïa ki dkhot jong ka seng kiba kam ba ma ki, ki dei ki trai jong kine ki syiar.
Halor kane ka nongrim ka seng PSM, JNC bad ki Nongri syiar ki la buh da ka ejahar ha u officer incharge ka Traffic Cell Phramer WJHD ban register case pyrshah ïa kine ki briew kiba don kti ha kane ka kam bad ruh ban pyngngat ha ki kyndon aiñ jong ka Benami Transactions (Prohibition) Act 1988 bad ruh ha ka kyndon aiñ jong ka Prevention of Cruelty to Animal Act 1960.
Da kaba ong ba ka jingleh jong kitei ki briew ka la pynkheiñ ïa ka kyndon ban shalan ïa ki syiar khlem da don ïa ki kot ki sla ba biang bad kiba la pynkheiñ ruh ïa ki kyndon aiñ jong ka BNS 2023.
