Khliehriat, Naitung 01: Ki nongtrei jong ka Jaiñtia Hills Autonomous District Council (JHADC) hapoh ka lama JHADC-Staff Association, ki la kyrpad ïa u Myntri Rangbah ka jylla Conrad K. Sangma ba un pyllait noh ïa ka pisa kaba 19 klur tyngka kumba u la dep ban kular lyngba ki lad pathai khubor.
Kitei ki nongtrei ka JHADC ki la pynkynmaw ba u Myntri Rangbah ka jylla ha ka jingwan hiar sha Jowai ha ka 21 tarik Jymmang 2025, u la pynbna ban pyllait noh ïa pisa 20 klur tyngka sha ka Jaiñtia Hills Autonomous District Council (JHADC) bad ba ka council ruh ka la dep ban siew tulop na ka bynta 2 bnai jong u bnai Risaw Naiwieng 2024 sha ki nongtrei jong ka.
Ha katei kajuh ka sngi, u Myntri rangbah u la kular ruh ba hapoh ar ne lai taïew ka Sorkar Jylla kan sa pyllait sa 19 klur tyngka sha ka JHADC hynrei haduh mynta ka JHADC ka khlem pat ïohpdiang ïa kata ka T. 19 klur na ka sorkar jylla, la ïathuh ki nongtrei ka JHADC.
Kumta ki la kyrpad ïa u Myntri Rangbah ba un pyllait noh ïa katei ka T. 19 klur kumba ula kular khnang ba ka council kan ïoh ban siew ïa ka tulop ba sah jong ki nongtrei kaba naduh u Nohprah 2024 haduh Jylliew 2025 bad ba kin ïoh ban lehkmen Behdeiñkhlam kumjuh ruh ba kin ïoh ban siew ïa ki ram ki shah jong ki.
