4th Division U-20 : Pynliem ka Laitkroh ïa ka Thynroit da 1-0 kol

Shillong,  Naitung 01 : Ka kynhun ïalehkai jong ka Laitkroh Sports Club ka la ïoh ban pynliem noh da tang 1-0 kol ïa ka Thynroit SC ha ka jingïakhun jong ka 4th Division Under -20 Football League 2025 kaba long hynne ka sngi Ba-ar ha Madan SSA Stadium, Shillong.

Ha ka jingïalehkai, ia katei ka kol jop na ka bynta ka Laitkroh la ïoh ban thep da u Ïaikiew Myrthong tang ha ka minit kaba 9 jong ka kylla step. Kane ka jingïalehkai ka la neh khlem da don ba ïoh shuh ban thep kol tad hdauh ban da kut ka kylla step.

Ynda la poi ka kylla miet ka jingïalehkai ka la nang itynnad namar baroh arliang ki pyrshang borbah ban ïoh thep kol. Hynrei hangne ruh ym shym la don ba ïoh ban thep kol kumta tad haduh ban da kut ka por ïalehkai, ka Laitkroh ka la ïoh ban khur suk ïa ka jingjop da katei ka shi kol.

Ka jingïakhun ha ka sngi Balang pat kan long hapdeng ka kynhun ïalehkai jong ka Risa Colony SC pyrshah ïa ka Golfink SC ha ka por 4:00 baje janmiet ha madan SSA Football Stadium, Shillong.