Shillong, Lber 12 : Ka Kynhun Myntri ka Sorkar Jylla mynta ka sngi Ba-ar, ka la ai jingmynjur ïa ka Meghalaya Industrial and Investment Policy, 2024 ba thymmai, ka ban plie lad ïa ka jingbei tyngka ne seng kam seng jam ba palat T.10,000 klur da ki riew shimet nalor ban pynthikna ban aikam 90% ïa ki trai shnong ha ka kyrdan Unskilled.
Haba kren sha ki lad pathai khubor hadien ka jingïalang, u Myntri Rangbah ka Jylla Conrad K Sangma ula pyntip ïa kane ka Policy ba thymmai yn sa pyllait paidbah ha ka 14 tarik u Lber. Hadien kane yn sa pynbud da ka jingïasoi ïa ki katto katne ki soskular Memorandum of Understanding (MoU).
U Conrad ula ong ba lada kren kyllum, ka Industrial Policy ba thymmai ka pynleit jingmut ha ki ar bynta-kawei ka long ban aikam aijam bad ban kyntiew ïa ki kam ba la buh hakhmat kum ka kam jngohkai, ka rep ka riang, ka food processing, ka pule dangle, IT bad kaba ar ka long ban pynshlur ia ka jingthied ïa ki mar napoh ka Jylla Meghalaya.
“Ngi la buh ruh katto katne ki kyndon ba ka jingaikam ïa ki trai shnong ha ka kyrdan unskilled, shisien bala ai subsidy,ka dei ban kot haduh 90% na ki trai shnong” ong u Conrad.
Hynrei ula ong “Haba phai pat sha ki kam ba donkam ïa ki briew ba tbit kum ka nuksa, phi donkam ïa ki engineer ban trei ïa ki optical fibre lane ki special cook ïa ki jait jingbam ba kwah bad lada ki trai shnong kim don ïa kane ka sap treikam, ngi la ailad ba kumba 2 snem tang 25% yn donkam ban thungkam ïa ki trai shnong hynrei ha kine ki arsnem kane ka nombor ka dei ban kiew sha ka 50% la kumno kumno ruh”.
Haba ñiew ïa kane ka policy thymmai kum kawei na ki Policy kiba biang eh hapoh ka Ri, u Myntri Rangbah ula ong “Kane ka dei ruh kaba ïaid ha ryngkat ka thong jong ka Jylla ban kynjoh ïa ka 10 billion dollar economy”.
“Da kum kane ka policy bala don, ngi khmih lynti ba ngin sa tam palat ïa ka shi billion dollar da T. 10,000 klur ka jingseng kam seng jam bad bei pisa kaba ngi la buh ha kine ki 3-4 snem ban wan” ula ong.
U Myntri Rangbah ula pyntip ruh ba ka Sorkar Jylla dang shen ka la wanrah ïa ka Industries Meghalaya Agency (IMA) ban pynbeit ryntih ïa ka kam seng kam bad bei pisa hapoh ka Jylla.
