Shillong, Lber 12 : U Myntri Rangbah ka Jylla Conrad K Sangma mynta sngi Ba-ar, ula ong ba ka Sorkar Jylla ka la jan dep artad ïa ki lad ki lynti ha ka ban lah pynbeit noh ïa ka kam ba ïadei bad ka jingpynkynriah ïa ki 342 tylli ki Longïing Harijan na Them ïew Mawlong.
Haba ïakren bad ki nongthoh khubor, u Conrad ula ong “Ngi la jan dep artad ban ïapynbeit ïa ki lad ki lynti bad ngin sa lah ban pyndep noh kham kloi ïa kane ka kam”.
“Ngi la don ha ka kynti ba sah satang ban shim rai bad ki nongshong shnong ki dei ban ïaroh ïa kane bad nga thikna bad kular ïa ki nongshong shnong ba ngi la shim khia bha ïa kane ka kam” ula bynrap.
Kane ka jingkynthoh jong u ka la mih tang arsngi hadien ka jingjia pynbthei bomb IED ha Them ïew Mawlong bad ka jingkynnoh ba kane ka jaka ka la pynijli ïa ki paidbah ka Jylla.
U Conrad ula ong ba ki paidbah bad ka Jylla kin ïaroh namar ka dei ka sien ba nyngkong eh ba kala don ka jingshimkhia da kano kano ka Sorkar ban pynkynriah ïa ki nongshong shnong na katei ka jaka.
