Mudui Sundaystar Lyngkhoi ha u DC ba shah khang tala ar tylli ki skul ha ka shnong Mawthawpdah

Mawkyrwat, Lber, 10: U Myntri shnong jong ka shnong Mawthawpdah, u bah Sundaystar Lyngkhoi ha ka shithi ba u la thoh bad phah sha ka ophis u Deputy Commissioner, South West Khasi Hills District ula pyntip ba hadien ba la ïohi ïa ki kynrum kynram hapoh ka shnong Mawthawpdah lyngba ki social media, na ka liang ka Dorbar Shnong ka don ban pynshai halor ki katto katne ki mat.
‘Ba u bah Sparlindro L. Marshilong ryngkat bad ki nongshong shnong hapoh ka jingïalam jong u ki la leit ban khang-tala ïa ka skul Mawthawpdah Presby-terian (Deficit) Upper Primary School bad ïa ka Government Lower Primary School, Mawthawpdah bad ha kaba ki la leh ïa kane ka kam ruh khlem ka jingtip lane khlem ka jingai bor jong ka Dorbar Shnong’.
Shuh shuh hadien katto katne sngi jong ka jingkhang-tala, ïa ka Government Lower Primary School, Mawthawpdah la ïoh ban plie noh ha ka 07.03.2023 da ka ophis DSEO bad kiwei ki Ophisar ryngkat ka jingïadonlang jong u bah Sparlindro L. Marshilong lem bad ki nongshong shnong.
Ha kajuh ka por u la pynpaw ruh ba la pynlong ïa ka Dorbar Shnong ha ka 08.03.2023 ban ïashai halor kine ki kynrum kynram, ha kaba ka Dorbar Shnong ka la kyrpad ruh ïa kine ki nongshong shnong ban plie noh ïa ka Mawthawpdah Presbyterian (Deficit) Upper Primary School khnang kan nym long ka jingduh nong ïa ki khynnah skul hynrei ki paidbah hapoh ka jingïalam u bah Sparlindro L. Marshilong kim kohnguh ïa ka jingkyrpad. Namarkata, halor kane ka kam na ka liang jong ka Dorbar Shnong ka la ai jingthoh noh sha ka ophis DSEO, Mawkyrwat ba kin sa leh ïa kaba donkam.
Kane ka long katkum ka kyrwoh ba la phah da u Myntri Shnong Mawthawpdah, u bah Sundaystar Lyngkhoi.